Nikku Olsen misileraalluni aalisartitserusuppoq
Paggattassiilluni qaleralinniartitsinerup eqqunneqarnera aalisartunut maanna ajornartorsiortitsilerpoq. Ukiummi naanissaanut suli qaammatit tallimaasut pisassiissutaasut nungoreerpaat. Tamatumunngalu aaqqiissutissatut Nikku Olsen sumiiffinni qaleralippassuaqarfiusutut ilisimaneqartuni misileraalluni aalisartitsinikkut tamanna aaqqiissuteqarfigerusuppaa.
-Ullumikkut aalisartorpassuit taamatut pisassat nugunnerini aalisakkanik allanik aalisalernissaminnut ajornarluinnangajappoq ikaarsaariarnissaq, ilaatigut tunitsiviit aalisarnermilu sakkut ataqatigiinnginneri pissutingalugit. Taamaattumik Partii Inuit isumaqarpugut pisassat ilaneqassanngippata qaleralinnik misileraalluni aalisarnissat maanna aallartinneqassasoq, Nikku Olsen nassuiaavoq.
Tamatumunnga ilaatigut peqqutissaqarluarpugut ukiuni siuliini qaleralinniarneq taamaallaat ilulissat saavani ingerlanneqartartoq maanna qaleraleerarpassuit kusanarluinnartuik alliartornerat ingerlasoq ilutingalugu qaleraleqarfiit ilulissat saavata avataani piffinni allaniittut takussaaleriartuinnartut ilisimaleratsigu.
Taamaammat qaleraleqarfiit piffinni assigiinngitsuniittut maannamut misileraavigineqartariaqarput, taamaalilluni pisassanik ilasinngikkaluarluni misileraaluni qaleralinniarneq ingerlanneqartariaqarpoq.
Partii Inuit nammineerluta ilulissani aammalu ilulissat eqqaani aalisartut akulikitsumik oqaloqatigisarnerini pissuisiviusut aallaavingalugit qaleralittassat ilaneqarsinnaaneri ajoriffissaqartinngilarput, uani aalisapilunneq pineqanngimmat aalisartut namminneerlutik ilisimasaat aallaavigissagutsigit, Nikku Olsen oqarpoq.
