Niels Thomsen Demokraatini siulittaasussatut innersuunneqarpoq
Illua tungiliuttuni partiimiit Demokraatiniit tusagassiutinut allallutik nalunaarput, Randi Vestergaard Evaldsen partiimi juunip 16-iani 17-ianilu ataatsimeersualerunik siulittaasutut qinigassanngortinnianngitsoq.
Nalunaarut naapertorlugu siulersuisut isumaqatigiillutik Niels Thomsen siulittaasussatut innersuussutigaat.
- Isumaqarpunga Demokraatit piffissami matumani kusanartumik ineriartortut aamma ilungersuutigissavara siuariartornerup ingerlaannarnissaa. Arlaannaataluunniit qularissanngilaa, anguniaratsigu nunami maani partiini annersanngornissarput politikkimut ingerlanneqartumut annerpaamik sunniuteqarumalluta aamma inuiaqatigiit kusanartumik ineriartortikkumallugit, Niels Thomsen oqarpoq.
Niels Thomsen siulittaasunngussaguni, partiimi ataatsimeersuarnermi qinigaasariaqarpoq. Inatsisartunut qinersinermi Demokraatini qinersiseqarnerpaartaavoq, 2773-init taguunneqarami.
Randi Vestergaard Evaldsen partiimi siuttut ilaattut ingerlaqqissalluni neriuppoq. Nuna tamakkerlugu ataatsimeersuarnermi siulittaasup tulliatut politikkimik suliaqartutut qinigassanngortissalluni neiuppoq.
- Nuannaarutigilluinnarpakka tulluusimaarutigalugillu Demokraatinut siuttuuninni angusimasagut aammalu partiitta siuariaqqinnissaata suleqataaffigeqqinnissaanut qilanaarpunga, kisianni siulittaasutuunngitsoq, Randi Vestergaard Evaldsen oqarpoq.
Evaldsen siulittaasutut tunuassalluni siulersuisuunerni maajip 27-ani ataatsimiinnermi nalunaarpoq.
