Nick Nielsenip Siumut akerlilersoraa
- Siumup anguniagai ilisarisinnaajunnaaqqavakka, Nick Nielsen Facebookimi quppernermini taama allappoq.
Doris Jakobsen Kim Kielsenimit sapaatit-akunneri marlussuit matuma siorna peqquneqarpoq peqqissutsimut naalakkersuisuunerminit sulinngiffeqaqqullugu, Folketingimut Nick Nielsenip sinniisutut ilaasortaaffigisaanut uterniassammat.
Aamma atuaruk Nickip Naalakkersuisunik tikkuartuisimanini soraarsitaassutigigaa
Tamanna pivoq, Nick Nielsen Folketingimi Pituffik pillugu nukingiussamik oqallittoqarnerani Søren Espersenimit (DF) aperineqarmat, Siumup naalakkersuisuutitai isumaqatigiinniarnernut tamanut peqataasimanersut, tamatumunngalu akivoq "danskit naalakkersuisui qanimut suleqatigineqarsimasut” isumaqarluni.
Taamatulli akissuteqarnera Kim Kielsenip isumaqatiginngilaa. Partiip Siumup siuttuisa Nick Nielsen peqquaat naqqiissuteqaqqullugu. Taamatulli pisoqanngilaq, Kim Kielsenillu Nick Nielsen tatigiunnaarpaa.
Tamannalu pissutigalugu Nick Nielsen Facebookimi ima allappoq:
SULIFFEQARFIIT ALLAMIT AQUTAT?
Allattoq: Nick Nielsen, Siumut
Pituffik pillugu suliaq tamatumalu ingerlanneqarsimanera akuerineqarsinnaanngilluinnarput! Suliffeqarfiit allamit aqutat akuerineqarsinnaannginnerat siammasissumik isumaqatigiissutigineqarmat nuannaarutigaara.
- Eqqaamaneqassaarli, nunatsinni suliffeqarfiit allamit aqutat suliassarpassuarnik tigusisarmata taamatullu aningaasanik nunatsinnit annissuillutik. Kingullertigut Nuup Umiarsualivia suliariumannittussarsiuunneqarpoq.
- Siumup neriorsuutigigaluarpaa najukkami assassugassanik suliffeqarfiutillit illersorniarlugit sulianut ataasiakkaanut suliariumannittussarsiuussisoqartassasoq. Kisianni! Suliffeqarfik allamit aqutaq suliassamik tunineqarpoq, suliniutigineqartorlu ataatsimut suliariumannittussarsiuunneqarluni.
- Siumup anguniagai ilisarisinnaajunnaaqqavakka. Isumaqarlunga siunissami suliassanik tunniussisarnermi najukkami assassugassanik sulisartut illersorniarlugit suliassanut ataasiakkaanut suliariumannittussarsiuussisarnissaq Siumup qineqqusaarutigigaa.
Oqaatsit ilaatigut isumaqarneq-ajorput, iliuutsitigulli sunarpiaq anguniagaanersoq ersertarpoq - tamanna ajorpoq!
/nick
Aamma atuaruk Nick Nielsenip soraarsitaanini paasiuminaatsippaa
