Nick Nielsenip pisuutitsineri isiginnaartitsisarfiup pisortaata tunngavissaqannginnerarpai
Meeqqanut isiginnaartitsissutip "Marluullutap" sinerissap annersaanut aappaagu februaarip qaammataanimi angallannissaa taamaatiinnartariaqarsimallugu Svenn Syrinip uppernarsarpaa, tamatumunngalu pissutaasoq erseqqilluinnarnerarlugu:
Angalalluni isiginnaatitsinissamut missingersuutit tamarmiusut 355.560 koruuninik aningaasartaqarput, taakkunanngalu 290.000-t angalanerinnarmut atorneqartussallutik.
Tips- og Lottomit aningaasaliissutinut 200.000 koruuninik tapiiffigineqarnissamik qinnuteqartoqarsimavoq. Qinnuteqaallu akuerineqassagaluarpalluunniit, suliniup ingerlannissaanut 155.000 koruunit amigaatigineqartussaassallutik.
- Siulittaasunut aningaasatigut akisussaasutut tamatuma piviusunngortissinnaanera januaarimi pisinnaanngitsutut nalilerpara, nalorninartoqarpallaarmat, isiginnaartitsisarfiup pisortaa allappoq, taanna aamma isiginnaartitsisarfiup siunissamut pilersaarutaanik annertuumik allanngortitileruttorpoq missingersuutit 3 mio. koruuninik ikilisinneqartut naleqqussarlugit.
Isiginnaartitsisarfiup oqaloqateqarusussimannginneranik Nick Nielsenip pisuutitsinera Svenn B. Syrinip aamma ilumuunnginnerarpaa.
Nick Nielsen aningaasanut inatsisissap akuersissutigineqarnissaa ullunik sisamanik sioqqullugu novembarip aqqarngani oqaloqatigiinnissamut qaaqqusivoq. Piffissami tassani Syrin siulersuisullu siulittaasuat Juaaka Lyberth angalapput, isiginnaartitsisarfiulli saaffiginnissut novembarip 14-iani akivaa novembarillu 28-iani ataatsimiittoqarluni, isiginnaartitsisarfiup pisortaa taama erseqqissaavoq, aammalu Isiginnaartitsisarfiup naalakkersuisoqarfiullu kinguneqarluartumik oqaloqatigiissinnaanerat siunertaajuarnerarlugu
Partiip Demokraatit siulittaasua Nick Nielsenimik isornartorsiunermini toqqaannarneruvoq:
- Nick Nielsenip sinerissami meeqqat isiginnaartitsiffigineqarnissaannik kissaatigilluinnaqqissaarsimaguniuk, taava Nunatta Isiginnaartitsisarfiata missingersuutai attorsimassanngikkaluarpi, Jens B. Frederiksen taama allappoq.
