Nick Nielsenip oqaaserisai biskoppip tupigusuutigai
- Kalaallit Nunaanni Ilagiit tassaapput ilagiit iivangkiiliulersaartut lutherikkuusut. Inatsimmi tunngaviusumi aamma taama taaneqarput. Taamaattut tunngavipput Naalakkersuisup Nick Nielsen allanngortinniarnerpaa? Nunatta biskoppia Sofie Petersen allakkamini ilaatigut taama allappoq.
Nick Nielsen: Pissaaneq biskoppimiinnani ilagiinniittariaqarpoq
Isumassarsiaq apostilikeriniit piinsisiortuniilluunniit pissarsiarisimaneraa aamma apeqqutigaa. Aamma isumassarsiaq Qallunaat Nunaanniit pissarisarisimaneraa apeqqutigaa. Upperisarsiornermik ilisimatusarnikumut pissaaneq tunniunnissaa tulluartuusorinngilaa.
-Immaqaana Naalakkersuisup siunnersuisoqatigiit eqqaagamigit Qallunaat Nunaanniit isumassarsisimasoq. Imaaliinnarlutali uagut nunatsinni ilageeqarneq allatut aaqqissuussaammat issuaasinnaanngilagut. Soorlu ilagiit sinniiseqarnikkut. Nalunngilarpullu kommuunerujussuanngortitsinermi misigisat pitsaavallaanngitsutut nalilerneqartartut, biskoppi taama allappoq.
Ilageeqarneq ullutsinni sanngiippoq, nukittorsarneqartariaqarporli. Taamaaliortoqassappat pissaaneq biskoppimiinnani inuiaqatigiinniittariaqartoq, Ilageeqarnermut Naalakkersuisoq Nick Nielsen isumaqarpoq. Oqaluffeqarnermut inatsisip allanngortinneqarnissaanut siuannersuuteqarniarluni pilersaarpoq.
Nunatsinni ilageeqarnermi sinniisut siulittaasuisa ilaasa ilageeqarnermut inatsi allanngortinnialugu siunnersuuteqalikkersaarneq isumaqatigaat, ilaali isumaqarput pissaaneq suli biskoppimiikkallartariaqartoq.
Nuummi ilagiit sinniisasaanni siulittaasoq Niels Olsenip ilageeqarnermut naalakkersuisup inatsimmik allanngortitsiniarluni siunnersuuteqarniarnera isumaqartigaa. Isumaqarami biskoppeqarfimmik suleqateqarneq pitsaanngitsoq.
Taamatulli oqaaseqarnera ilagiit sinniisaanni ilaasortap Therkel Husum-Isaksenip naammaginartinngilaa. Taannami Radioaviismut oqarpoq nammineq biskoppi isoriffissaqartinnagu, Niels Olsenilu tunuliaqutaqarani nammineq isummanik saqqummiussisoq.
Niels Olsenip isortartorsiuinera biskoppip aamma paasisinnaannginnerarpaa, oqaatigalugulu ilagiit sinniisaat periarfissanik ulikkaartut, kisiannili ikiorsiinissamut aaqqiinerit sunut tamanut atorneqarsinnaanngitsut. Naalli aningaasanik inunnik ikuinermi atugassanik immikkoortitsisoqarnikuugaluartoq, Nuummi Ilagiit sinniisaat qinnuteqarsimanngitsut oqaatigaa.
Ilulissani ilagiit sinniisaasa biskoppimik suleqateqarnerat ajunngitsoq, Ilulissani ilagiit siulittaasuata Inger Mølgaardip oqaatigaa.
Sisimiunili ilagiit sinniisaasa siulittaasuata Karl H. Mikkelsenip aamma Nick Nielsenip siunnersuutiginiarlugu aalajangiussaa isumaqatigaa. Isumaqarami biskoppimik suleqateqarneq pitsaanngitsoq.
Biskoppip Sofie Petersenip erseqqissaatigaa lutherikkuusut oqaluffiat illersortussaallugu. Nick Nielsenillu ilageeqarnermut inatsimmi allanngortitsiniarluni siunnersuuteqarniarnera tulluartuutinngilaa.
