Nick Nielsenip Københavns Politi tupannarnerarpaa
Kalaallip Københavnimi angerlarsimaffeqanngitsup ikiortariaqarnerata nalaani, politiit eqqunngitsumik pissusilersorsimanertik nassuerutigereeraallu, folketingimut ilaasortaq, Nick Nielsen oqallinnermut ilannguppoq.
Allattoq Niels Krogh Søndergaard, Apollo Jeremiassen
decembarip 22-at 2014 15:51
Aviisimi Politikenimi allaaserineqartumi, kalaallip Danieliup ikiorneqarnissaanik politeeqarfimmut siannguttut, politiinit soqutigineqarsimannginneri, Nick Nielsenip tupigusuutigalugu tupannarnerarpaa.
- Ikiortariaqartup kalaaliuneranik imaluunniit danskiuneranik sianertut politiinit apersorneqarsimaneri isumakulunnarpoq. Ingammik ikiortariaqartoq inuunerminik ulorianartorsiortoq eqqarsaatigigaanni tamanna pissusissaamisuunngilluinnarluni, Nick Nielsen tusagassiutinut nalunaarumminni allappoq.
Danskit inatsiseqarnermut ministeriat, Mette Frederiksen, sulinngiffeqarnerniminit uteriaruni attaviginiarlugu, Nick Nielsen neriorsuivoq.
