Nick Nielsen Savalimmiunut tikeraaqqammerpoq
Savalimmiormiut suliffeqarfiini savalimmiormiut oqaasiisa ulluinnarni atugaalerulernissaannik sulissuteqarnerup qanoq iluatsissimatiginera Nick Nielsenip alutorsaatigilluarsimavaa.
- Suliassaq taanna uagutsinnut Kalaallit Nunaanniittunut naleqqiullugu savalimmiormiunut oqinnerusimassaaq, inuimmi qeqertanut nuuttartut oqaatsitigut ilaqutariissutsikkullu attuumassuteqanngitsut ikittuararsuupput. Aamma nunanit avannarlernit allanit, savalimmiormiut oqaasiinut qanittunik oqaaseqarfiusuniit qeqertanut nuuttartut qaammatit pingasut missinginnaat qaangiukkaangata savalimmiormiusut ilikkartarnerat misilittakkat takutippaat, Nick Nielsen tusagassiorfinnut nalunaaruteqarluni taama allappoq.
- Uagut oqaatsivut nunani avannarlerni oqaasiusunit allaanerujussuupput, oqaatsilli kulturikkut paaseqatigiinnissamut inuiaqatigiinnullu akuliunnissamut pingaaruteqarluinnartunut ilaammata isumaqarpunga, maanga nuuttartunut innuttaasunullu suli kalaallisut oqaaseqartuunngitsunut tunngatillugu ataatsimoorussamik suliniuteqarnissarput pisariaqartoq. Aamma tamanna maanga nuuttartut amerlanerujussuit ullumikkornit sivisunerusumik maaniikkumalernerannik kinguneqassasoq qularinngilara, Nick Nielsen isumaqarpoq, taassuma aamma aqqusinermi angalatilluni savalimmiormiut oqaasiisa atugaanerujussuat maluginiarsimavaa.
- Naalakkersuisut pilerisaarineq pillugu inatsisissatut siunner¬suummik 2014-imi upernaakkut ataatsimiinnissami saqqummiussissapput, tassani siunner-suutiginiarlutigu pisortatigoortumik oqaatsitta piseqqusaarutini, annonceni allagartalersuinernilu pinngitsooratik atugaalernissaat, soorlu Savalimmiuni taamaattoqartoq. Taassuma sa¬niatigut aamma isumaqatigiissutit inatsisitigut pituttuisuusut, soorlu illusinermi, kalaallisut allassimasalernissaat qulakkeerniarlugu sulinerput ingerlaqqissaaq. Pissutsit tamakkununnga tunngasut savalimmiormiut oqaasinut tunngatillugu aaqqinneqareersimapput, taamaammat tamakku maani aamma anguneqarsinnaanissaat piviusorsiortuusoraara, Nick Nielsen allappoq.
Nick Nielsenip Savalimmiuniinnermini imarsiornermik ilinniarfiit, Torshavnimiittoq Klaksvikimiittorlu, aamma pulaarpai.
Savalimmiunilu imarsiornermik ilinniarfiit 300-nit amerlanerusunik ilinniartoqartut maligassaalluarput.
- Savalimmiuni ilinniarfiit uagullu Imarsiornermik ilinniarfiutitta attaveqaqatigiilernissaat isumagissavara, soorlu assersuutigalugu isumannaallisaanermik pikkorissaanerit pillugit, pikkorissaanerimmi inatsisitigut piumasaqaataasut ingerlannissaannut atortorissaarutit nutaaliaasut Sjónámimi, tassa Klaksvikimi Skipperskolemi pigineqarput, Nick Nielsen naggasiivoq.
