Nick Nielsen: Ilinniarfiit sinerissamut siaruaatsinneqartariaqarput
- Suut tamarmik Nuummiissinnaanngillat. Ilisimatusarneq imaluunniit ilinniarneq taamaallaat Nuummiissinnaasut eqqarsartoqalerpoq, tamanna ilumuunngilaq tassami Ilulissani aamma illoqarfinni allani ilinniarnerit ingerlaneqakutsoorsinnaapput, Ilinniartitaanermut Naalakkersuisoq, Nick Nielsen oqarpoq.
KANUNOKA-p siulittaasuata, Martha Abelsenip siunnersuutigaa, isumaginninnermut tunngasunik ilinniartitsinermi nukiit ataatsimut katersornissaat pisariaqarluinnartoq, taamaattumillu isumaginninnermut siunnersortinngorniat ilinniartitaaneri Ilulissanut nuunneqarnissaat siunnersuutigalugu. Tamannalu Ilinniartitaanermut Naalakkersuisup isumaqatigilluinnarpaa.
- KANUKOKA-p saqqummiussaa soqutiginarpoq, tassami oqaloqatigiinnerit aamma aaqqissuusseqqinnerit oqaloqatigiinnissatsinni eqqartussavagut. Avaqqunneqarsinnaanngitsormi unaavoq, ilisimasat ataatsimoortinneqarneranni ilinniarfimmik nukittuumik pilersitsisinnaavugut aamma tamanna Ilulissani pisinnaalluartoq qularutiginngilara, Nick Nielsen taama oqarpoq.
Isumaginninermut siunnersortinngorniap, Pilutaq Lennertip radioaviisimut ullaaq oqaatigaa, ilinniarfik Nuummiit Ilulissanut nuunneqarpat annaasassat annertuupilussuussasut, soorlu ilinniartitaanerup pitsaassusaa annaaneqassalluni.
Pilutaq Lennertip aamma Ilisimatusarfiup pisortaata, Tine Parsip taama isumaqarneri, Ilinniartitaanermut Naalakkersuisup isumaqatiginngilai.
- Nunatsinni ilinniartitaaneq inerisarneqarnialermat oqaluttoqartarpoq ilinniartitaanerit Qallunaat Nunaaniisinneqarpata tamanna pitsaanerusoq. Ilinniartitaanerli Nunatsinni ima inerilluarsimatigaaq ilinniarfinnik pitsaasunik peqalernikuulluta.
Ilinniartitaanermut Naalakkersuisoq, Nick Nielsen taama oqarpoq, naqissuserlugulu isumaginninnermut tunngasut ilinniartitaanerit Ilulissanut nuunneqarnissaat maanna eqqarsaataaginnarallarmat. Tamannali piviusunngortinneqassappat ilinniartitaanermut attuumassutillit tamarmik paasiniarneqarumaartut neriorsuutigalugu.
