Nick Nielsen GIF-imit taperserneqarpoq
Nick Nielsen ulluni februaarip 19-ianit 25-inut Ruslandimiissaaq. Taamaasillunilu Nunatsinnit peqataasutuaasup Martin Møllerip sapaammi februaarip 23-iani ujakkaarluni kilometerinut 50-inut sukkaniuteqataanissaa malinnaaffigisinnaassallugu.
GIF-illi aamma Nick Nielsenip Olympiadertoqarnerani najuunnera Kalaallit Nunaata siunissami nammineq erfalasuni atorlugu Olympiademut peqataarusunneranik takutitsiniarnertut isigiaa.
-Nammineq erfalasoriaq atorlugu peqataasalernissamik suliaq sivisuupilussuuvoq, Olympiadertoqarneranulli najuukkiartornikkut olympiademillu suliaqartunik oqaloqateqarnikkut, Nunatta Olympiademi nammineq erfalasorisaq atorlugu peqataasalernissaanik takorluugaq anguagarlu qanillattorneqarsinnaavoq, Nunatsinni Timersoqatigiit Kattuffiata siulittaasua, Nuka Kleemann, nammineq Ruslandimut angalaqataasinnaanngitsoq, taama oqarpoq.
Kultureqarnermut naalakkersuisup Nunatsinni timersoqatigiit sinnerlugit Olympiademut najuukkiartornera Nunatsinni Timersoqatigiit Kattuffianit nuannaarutigineqartupilussuuvoq.
- Olympiademut ukiut sisamakkuutaaginnarlugit ingerlanneqartartumut tapersersuilluni najuukkiartornera Nunatsinni timersoqatigiinnut annertuumik pingaaruteqarpoq, GIF taama allappoq.
