Nick Nielsen akerliliivoq

Ilinniartitaanermut naalakkersuisup Nick Nielsenip isornartorsiut paasisinnaanngilaa, isumaqarami naalakkersuisut siuliisa massakkullu aqutsisut aningaasat immikkoortitai assigiittut.

-Isumaqarpunga isornartorsiuineq eqqunngitsoq. Erseqqissaatigissavara uani Naalakkersuisooqqatigiit naalakkersuisut siulii assigalugit, ilinniartitaanermut sinaakkutap aningaasaqarnermi assinganik  ingerlatsimmat, Nick Nielsen oqarpoq.

Taassuma eqqaasitsissutigaa, naalakkersuit aningaasat katillugit 60 millionit koruunit ukiunut tulliuttunut marlunnut immikkoortimmassuk, uffa Naalakkersuisut siulii 2013-imut 37,9 millionit koruunit immikkoortillugit, ukiullu tulliuttuni immikkoortitsisimanatik. Taamaattumik Naalakkersuisut ilinniartitaanermut aningaasaliissutinik ikililerinerarlugit oqalunneq Nick Nielsenip tusaajumanngilaa.

- Isumaqarpunga naalakkersuisut ilinniartitaanermut ineriartortitsinissamut aamma iliuuseqartut, Nick Nielsen oqarpoq.

Palle Christiansenilli Nick Nielsen oqariartuutaa isumaqartiginngilluinnarpaa.

Taassuma Ilinniartitaanermut ataatsimoortumik aningaasaliissutit taamani amerlanerunnginnerannut pissutaanerarpaa, aatsitassarsiornermit aningaasanik isetitsilluarnissap ilisimaneqarnera.

- Naalakkersuisuugallaratta politikkeraarput, akileraarutitigut immikkut isertitat tamarmik ilinniaetunut inissialiornermut ilinniartitaanermullu nakkartassasut. Ataatsitassasiornermit akileraarutitigut immikkut isertitaqarluaqigatta, taama tulleriiaarneq naammassivarput, Palle Christiansen oqarpoq. 

Naalakkersuisut immikkut ittunik aningaasanik massakkut isertitaqarnavianngitsut, taassuma oqaatigaa. Taamaattumik aningaasanik isertitassanik allanik nassaassarsiortariaqartut isumaqarpoq. Kisianni tassa aningaasanut inatsisissatut siunnersuut amigartoorfiusussatut aaqqisiissaavoq, Demokratinersorli isumaqarpoq, taamaaliorneq illersorneqarsinnaasoq, taamaaliorneq sanaartornerunissamik siunertaqarpat.

-Taamaaliortoqarsinnaavoq. Kisianni tassa ilinniartunut inissialiornissamut immikkoortitsisimannginnamik, missingersuusiornerminni taama amingartooruteqarnissaq taamaallaat naatsorsuutigaat. Taamaammat politikkertik qanorluunniit iliorlutik kusanartunngortinniaralurunikku, iluatsitsinavianngillat. Tassalu ilinniartitaarnermut aningaasaliissutinik ikilieripput, Palleq Christiansen oqarpoq

Asii Chemnitz Narupip, Palle Christiansenip allallu matuminnga suliarqartoq Nick Nielsen aamma isornartorsiornikuuaat, Nuummi ilinniartunut inissialiortitsinianngimmat, uffa ilinniartut inissaaleqinerat illoqarfiit annersaanni ersarinnerpaagaluartoq. Nick Nielsenili taama naliliinngilaq.

- Erseqqissaatigilara kolligianik imaluunniit inissaanik amigaateqarneq nunatsinni tamani piummat. Nunatsinnilu ineriartortitsinissaq tamarmi pisariqartinneqarpoq, taamaattumik oqartoqarsinnaanngilaq Nuummi kisimi pisariaqartitsineq annerusoq. Naalakkersuisooqqatigiit pingaartippaat nunarput ataatsimut isigalugu ineriartortitsinissaq, Nick Nielsen oqarpoq.