New Zealandimi meeqqat inersimasullu atornerlunneqarsimasut utoqqatserfigineqartut
Meeqqat inuuniarnermikkullu ajornartorsiutillit New Zealandimi perorsaavinni suliffeqarfinnilu allani ukiut 70-it kingulliit ingerlaneranni inissinneqarnerminni assigiinngitsutigut atornerlunneqarsimanngikkunik kinguaassiuutitigut atornerlunneqarsimasut, New Zealandip ministeriuneranit Christopher Luxonimit pisortatigoortumik marlunngornermi utoqqatserfigineqarput.
New Zealandimi maanna naalakkersuisut, siusinnerusukkullu naalakkersuisuusimasut sinnerlugit utoqqatsertoqarpoq.
New Zealandimi nunap inoqqaavisa Maorit, inuillu timimimmut tarnimikkullu innarluutillit atornerlunneqarsimasut pingaarnertut utoqqatserfigineqarput.
Ukioq manna juulimi misissuisoqareernerata kingorna utoqqatsertoqarpoq.
Milliardilikkuutaanik taarsiivigineqarsinnaasut
Meeqqat inuuniarnermikkullu ajornartorsiutillit 200.000-t, naalagaaffiup suliffeqarfiini, upperisarsiornermiluunniit suliffeqarfiit ilaanni 1950-ip 2019-illu akornanni inissinneqarsimasut, assigiinngitsutigullu atornerlunneqarsimasut misissuinerup takutippaa.
Assigiinngitsutigut atornerlunneqarsimasut pinngitsaalineqarsimanngikkunik, kinguaassiorsinnaajunnaarsitaasimanngikkunik qupinnguallatsitsinikkut naalliutsitaasarsimasut misissuinerup ilaatigut aamma takutippaa.
New Zealandimi inuit ukiut 70-it kingulliit ingerlaneranni assigiinngitsutigut atornerlunneqarsimasut New Zealandip aningaasaannik dollarinik milliardilikkuutaanik taarsiivigineqarsinnaasut, New Zealandip ministeriunerata oqaatigaa.
