New Zealandimi innermik anitsisoqarnerani ajunaartut 19-inngortut

Illoqarfimmi Aucklandimi napparsimmavimmut unitsinneqartut ilaata aqqunartiternini uutiterninilu ippassaq sapaammi toqqutigai. New Zealandimi politiit taama nalunaaruteqarput.

Ajunaartut 19-it akornanni marluk suli nassaarineqanngillat.

Inuit 47-t, amerlanerit Australiamit takornariat qeqertami innermik anitsisartumi White Islandimiillutik qaqqaq decembarip ulluisa qulingiluaanni ualikkut innermik anitsilerpoq.

AAMMA ATUARUK New Zealandimi innermik anitsisoqarnerani ajunaartut kingulliit kinaassusersineqartut

Inuit 25-t uutiternitik pillugit New Zealandimi napparsimmavinni assigiinngitsuni suli uninngapput, taakkunanngalu amerlasuut perulullutik.

Takornariat qeqertami innermik anitsisartumi killilersorneqaratik angallassinnaanerat qaqqap innermik anitsinerata kingorna isornartorsiorneqarpoq.

New Zealandimi oqartussat pisoq misissuiffigileruttoraat, New Zealandip ministeriunerunerata Jacinda Ardernip ilisimatitsissutigaa.

Ajutoornermut akisussaaffik misissuinikkut inissinniarneqassaaq, akisussaasullu ukiuni pingasuni parnaarussassanngortinneqarsinnaallutik.