New Yorkimi imerniartarfinni qitittoqaqqusaannginneranut inatsit atorunnaarsinneqartoq
Inatsisip 1926-mi atuutilersinneqarsimasup atuukkunnaarsinneqarnissaa, New Yorkimi kommunalbestyrelsip siusinnerusukkut taasissutigisimavaa.
Inatsit ammit qalipaataat aallaavigalugu nikassaasuusoq, inatsimmik isornartorsiuisut oqaatigiuarsimavaat, tassami inatsit New Yorkip ilaani Harlemimi jazzklubinik aallaqqaammut eqquisimavoq, taartunik qaamasunillu amillit naapittarfiinik eqquiniartutut taaneqarluni.
Latinamerikamiut, inuillu suiaqatiminoortartut inatsisitigut aamma eqqorniarneqartut, inatsimmut illuatungiliisut oqaatigiuarsimavaat.
1990-ikkunni borgmesterip Rudy Giulianip inatsit pinerlunniartarnerup akiorniarneqarnissaanut atorpaa.
- Maanna 2017-iuvoq, inatsillu isumaqarunnaarsimavoq. New Yorkimi unnuakkut qiimasuttunut qitiulluinnarpoq, inuillu naapittarfigivaat, New Yorkip borgmesteria Bill de Blasio oqarpoq.
/ritzau/AFP
