Nersorneqarnissamik sinnattoq maangaannarpoq
Dronninngikkormiut nunatsinnut tikeraarnerat ilutigalugu, aalisartoq piniartorlu Kristian Heilmann 85-inik ukiulik Kommuneqarfik Sermersuumiit Dronning Margrethep tikinnissaata tungaanut ullut 14 sioqqullugit attavigineqarpoq.
Kommuneqarfik Sermersuup aggertitaata Kristian Heilmannip ernera panialu nuannersumik oqaluttuuppai, Kristian Heilmann nersornaasigassatut innersuunneqartoq, tamannalu piviusunngunngilaq:
- Neriorsuinermik aallaqqaammik pisoqanngikkaluarpoq, kisianni ilimatsatsitsisoqarpoq dronningip nersorniarsimagaluaraa, Kristian Heilmann ernera Johannes Heilmann oqarpoq.
Kommuneqarfik Sermersuumi sulisup ornigunnermini oqaluttuarsimavoq, Kristian Heilmann nersornaammik tunineqartussatut innersuussaasoq, tunniussinissarlu juulip 17-ani piumaartoq.
Taava taamaaleriarmat ilaquttasut sinneri qujasarneqarput, utoqqartartik Kristian Heilmann Dronning Margrethemit nersornaammik tunineqassasoq.
Ilaqutariit oqaluttuunneqarsimanngillat innersuussineq itigartitsinermik kinguneqarsinnaasoq, kisianni Dronning Margrethep tikinnissaa ullut marluinnanngormata, suli tusagaqannginnamik, ulloq taanna pisussat paasiniarlugit, Johannes Heilmann Kommuneqarfik Sermersuumut attaveqarpoq. Tassanilu nikallornartumik tusarliunneqarpoq:
- Ataatarsi siullermik kommunimi, namminersornerullutik oqartussani, namminersorlutillu oqartussani naalagaaffimmilu ukiut 40-t sulisimanngilaq, taannagooq taava pissarsisinneqarsinnaanngilaq, Johannes Heilmann oqarpoq.
Kommunimiit kukkuneq utoqqatserfigineqarput, kisiannili Kristian Heilmannimut ilaqutaasunut nersornaaserneqarnissap piviusunngortinneqannginnera assut pakatsinartoq, Johannes Heilmann oqarpoq:
- Quujanaageqaarput, taamatut utoqqarsuanngorluni 86-tungaanut ingerlasoq, taamatut neriulussinnermik pissutsinik tunineqarmat, Johannes Heilmann oqarpoq.
Ilaqutariit Heilmannikkut maannakkut pisoq qaangiutereermat oqaluuserinnereerlutik oqaatigaat itigartitsineq pitsaanerusumik naammassineqarsimasariaqaraluartoq:
- Taamatut neriulussinnertitsineq ingasappallaaqaaq, Johannes Heilmann oqarpoq.
Kommuneqarfik Sermersuumi pisortaaneq Søren Hald Møller attaviginiarsimaluaratsigu iluatsinngitsoorparput.
