Neriuffiup katersuiniarnerani KNR-imut aningaasartuutit annertunerat kattuffiup ilumuunnginnerarpaa
Katersuiniarnermi pilersaarusiortut aamma aallakaatitsinermi sulisut 100.000 koruuninik akeqarnerat ilumoorpoq. Sermitsiaq-AG-mi allaaserisami aningaasat katersorneqartut KNR-imut aamma danskit suliffeqarfiannut katersuiniarnermi pilersaarusiortunut Lynge Olsen A/S-imut tutsinneqarsimanerannik aviisimi allaaserineqartoq ilumuunngitsoq KNR-imit aamma Neriuffimmit oqaatigineqarpoq.
KNR TV-ikkut toqqaannartumik aallakaatitsilluni nuna tamakkerlugu katersuiniarnermi KNR 16-inik sulisoqarpoq.
- Teknik annertoorujussuaq atorlugu toqqaannartumik aallakaatitsivugut, aallakaatitsinerlu naleqarnerujussuugaluarpoq - kisianni aaqqissuussinerni Neriuffik peqatigalugu isumaqatigiissummik sanasarpugut, aamma Neriuffiup tamanna tupiginngikkaa nalunngilarput, KNR TV-imi pilersaarusiornermi pisortaq, Niels Pavia Lynge, taama oqarpoq.
Aviisip Sermitsiaq.AG-ip allaaserisamini KNR imaluunniit danskit suliffeqarfiat Lynge Olsen A/S oqaloqatigisimanngilai - aviisimi allaaserineqartoq malillugu KNR aamma danskit suliffeqarfiat Lynge Olsen A/S katersuiniarnermi pissarsiarineqartut 5 procentii pissagaat allassimavoq.
Aviisip Sermitsiaq.AG-ip Neriuffiup siulittaasua Sara J. Brandt oqaloqatigisimavaa, tassani issuarneqarpoq katersuiniarnermi KNR TV annertuumik aningaasartuutaasimasoq.
- Uani tupaallaatigilaarpara tupigalugulu oqartoqarmat danskit suliffeqarfiata Lynge Olsen A/S-ip annerpaaq pigaa, "taamaattoqanngilaq", suliffeqarfiup taassuma ikiorluangaatsiarpaatigut aamma pissusissamisoorpoq taakkua sulinertik akissarsissutigisussaammassuk, Sara J. Brandt oqarpoq.
Neriuffiup siulittaasuata Sara J. Brandtip uppernarsarpaa katersuiniarnermi suleqataasunut Neriuffik aningaasartuuteqarmat.
- Ilumoorpoq suleqaterpassuavut, sullisseqataasut uagutsinnut toqqaannartumik sulisut aamma pilersaarusioqatigut, taakkua suliffeqarfiugamik assigiinngitsutigut allatuulli Neriuffik aningaasartuuteqarpoq, Sara J. Brandt oqarpoq.
KNR-TV nuna tamakkerlugu katersuiniarnermi ukiumut marloriarluni peqataasarpoq.
- Kræfti akiorniarlugu suliniaqatigiiffik Neriuffik ukiup aallartinnerani katersuiniarnerani ikiortalernikuuarput, aamma ukiakkut meeqqat suliniaqatigiiffii nuna tamakkerlugu katersuiniarneriani ikiortarpatigut, taakkualu ukiorpassuarni ikiortarpaatigut, taannalu periuseq aningaasartuutitta ilaanik matussuseqarnissaannik isumaqatigiissuteqartarneq atorneqartarpoq, aamma qassiiliuutaanngisaannarnikuuvoq, KNR TV-imi pilersaarusiornermi pisortaq Niels Pavia Lynge oqarpoq.
Kræfti akiorniarlugu suliniaqatigiiffik Neriuffik nuna tamakkerlugu aningaasanik katersuiniarnerani Ilimmarfimmi arfininngormat ingerlanneqartumi aningaasat 2.525.246 koruunit katersorneqarput.