Neriuffik matukkut sianeqattaarpoq

Nappaassuup kræfte-p akiorniarneqarneranut nuna tamakkerlugu aningaasanik katersuiniarneq nalinginnaasumik oktoberip qaammaataani sapaammi siullermi pisartoq ullumi ingerlanneqarpoq. Neriuffiit kattuffiat katersinermik aaqqissuisuuvoq.
Allattoq Jaaku Lyberth
oktobarip 07-at 2012 16:01

Nuummi inuit namminneq pimasssutsiminnik suliaqartut 40-ut missaanniittut ullup qeqqata siorna aqqanerniit illunut tulleriaarillutik aningaasanik katersipput. Neriuffiit kattuffiani siulittaasup Johanne Olsenip neriuutigaa aningaasat  750.000 kr-nit ukiormanna  katersorneqarumaarput.

Illoqarfinni nunaqarfinnilu nuna tamakkerlugu aningaasanik katersisoqarpoq amerlanerni bingor-titsisoqarluni.

Nuummi Katersortarfimmi ullumi pingasoriarluni bingor-titsisoqarpoq.

Illunut tulleriaarillutik katersisut naammattoorneqarsimanngippata, illoqarfinni nunaqarfinnilu aningaasanik ikisiffigineqarsinnaasunik inissiisoqarnikuuvoq, soorluttaaq illoqarfiit bussiini aningaasanik ikisiffiusinnaasunik peqartoq.

- Aningaaanik katersiniarluni atortussanik illoqarfinnut nunaqarfinnullu nassitsisoqarpoq, Neriuffiit Kattuffianni siulittaasoq Johanne Olsen oqarpoq.

Aningaasat katersorneqartut ilai nappaammik kræfte-mik eqqorneqartunut taakkualu ilaqutaannut atorneqassapput. Ukiumut katillugit 200-nut tunniunneqartarput, inummut ataatsimut 3.000,00 kr tunniuneqartarlutik.

Neriuffiik Kattuffiat kræfte pillugu saqqummersitanik atuagaaqqanik atuakkanillu kalaallisuumut nutserneqartunik saqqummersitsisarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq