Nerisassanik eqqakkanik issunngortitsilluni suliniut Qeqqata Kommuniata ineriartorteqqinniaraa

Sisimiuni angerlarsimaffinniit 800-suniit, suliffeqarfinniit paaqqinnittarfinniillu eqqakkat uumassusillit containerit iluanni asiutillugit naggorissaatissanngortitsinermut ukiuunerani misiliutigineqartumut ingerlalluartumut ineriartorteqqinnissamut aningaasat atorneqassapput.

Issittumi eqqakkanik asiutitsilluni naggorissaatinngortitsineq isumassarsiaannaanngilaq piviusunngorsinnaanngitsoq, kisiannili piviusunngortoq.

Tamanna Sisimiuni siullermeerluni ukiuunerani misileraareernermi uppernarsineqarpoq, tamaanimi eqqakkanit uumassusilinnit pallet qisuiniit 15-tonsiusunit 7,5 tonsinik naggorissaatissanik piumaneqaqisunik pilersitsisoqareersoq.

- Pissanngatigisimaqaarput, silaannarmi nillernerusumi asiutitsineq ingerlanneqarsinnaanersoq, eqqakkalli 10 gradinut kissanneqariaraangamik asiuneq aallartinneqartarpoq piffissallu sinnera namminneq ingerlallutik, Suliami aqutsisoq Per Haugsted Petersen Rambøll Odensemeersoq nittartakkamut Ingeniøren.dk-mut taama oqarpoq.

AAMMA ATUARUK Sisimiuni nerisassat issunngortillugit suliarisaleraat

Suliffeqarfinnut paaqqinnittarfinnut angerlarsimaffinnullu eqqakkanik uumassusilinnik immikkoortiterinissamut peqataatitsiniarnermut misiliinermi piffissap annersaa atorneqarsimavoq.

- Eqqakkat katersorneqartut 2 tonsiunissaat ilimagineqarsimagaluartoq maanna sapaatip akunneranut 3 tonsiniit 5 tonsip tungaanut annertutigipput, aqutsisoq oqarpoq.

Ukiuunerani misiliineq iluatsilluaqisoq tunngavigalugu avatangiisinut aqutsiveqarfimmut 10 million koruuninik qinnuteqartoqarpoq.

- Aaqqiissutip matuma torraqutigaa, ataatsikkut containerit nillorsaatit nutaanngitsut nunatsinni arlalinngorlugit mangaannaq iliinnarneqarsimasut, palletit qisuit eqqagassat atorluarneqarsinnaammata- taamaalilluni naggorissaatiliortoqarsinnaalluni, nunatsinni innuttaasut aasaanerani namminneq naatitanik naatitsisinnaalerniassammata, Per Haugsted Petersen Ingeniøren.dk-mut taama oqarpoq.