Neqimi tuttunik toqoraasoqartalertussangorpoq
Toqoraaviup Narsamiittup, Neqip, aamma tuttunik nujuitsunik uumasuutillip, Angaartaaq Janussenip, isumaqatigiissutaata, nersutit nakorsaanit nakkutilliisunit akuerineqarneratigut, Nunatsinni toqoraavituaasumi tuttup neqaanik tunisassiornissaq maanna qulakkeerneqarpoq. Toqoraavik savat neqaannik annerusumik tunisassiortaraluarpoq.
Allattoq Hagen Højer Christensen, Elisa Isaksen
oktobarip 18-at 2013 07:25
Isumaqatigiissutip kinguneranik, tuttut nujuitsut Narsap eqqaani qeqertami Tuttutuumiittut, qeqertami tassani toqorarneqartassapput, neqaallu Neqimi nersutinik toqoraasunit aamma nersutit nakorsaannit nakkutilliisunit kinguninngua tigoorarneqartassapput, misissorneqareeraangatalu tunisassiarineqartassallutik.
Nutaamik isumaqatigiissuteqarnerup kinguneranik tuttut nujuitsut ukiumut 250-it missaanniittut tunisassiarineqartassapput, tamatumalu kinguneranik Neqimi tunisassiornerup annerulernissaa qulakkeerneqarpoq. Savaaqqanillu ukiumoortumik toqoraanerup kingorna tuttup neqaanik tunisassiortoqartassalluni.
