Neqi A/S-ip toqoraavittaava Inuusuttut Ataqatigiit isumalluarfigaat

Taamaammat aamma Neqi A/S-ip Narsami toqoraavimmik ammaanera nuannaarutigaat. Tamannami inuusuttut suliniaqatigiiffiata nunatsinni nerisassianik ineriartortitsinermi alloriarnertut pingaarutilittut isigaat. Narsamili uranimik piiaasoqalissagaluarpat, ineriartorneq taanna pissutigalugu nunalerinermik ineriartortitsineq unitsinneqassasoq aamma qularutiginnginnerarpaat.

Taamatullu pisoqassappat uggornassaqaaq, nutaarsuarmimmi nutaaliaasumillu toqoraavittaartoqarneratigut Nunatta imminut pilersornerunissaanut piffiit nutaat maanna aallartipput, Inuusuttut Ataqatigiit tusagassiorfinnut nalunaaruteqarlutik taama allapput.

Kalaallimmi nerisassiaannik atuineq ineriartortitsinerlu Kujataata siuttuuffigaa. Kujataamiut isumassarsiorfigisigit kalaalillu nerisassiaannik igaffitsinni atuinerulernissatsinnut amerlanerusunik suliniuteqarluta.

Ineriartornerli taanna ingerlaannassappat, suliniaqatigiiffik isumaqarpoq  savaaqqanik savanillu tusinermi akit qaffanneqartariaqartut. Suliniaqatigiiffimmi naapertorlugut akit ukiuni kingullerni pingasuni nikissimanngillat. Tamannalu savaatillit aningaasaliinissaannut periarfissaannik annertuumik killiliisinnaavoq.

Inuusuttut Ataqatigiit Nunalerineq pillugu isumalioqatigiissitat isumaliuutissiissutissaat pissangallutit maanna utaqqivaat, nunalerinikkut ineriartortitsinerunissamut suut pisariaqartinneqarnerinik tikkuussisinnaassammat.