Neqeroortitsinermi malittarisassat pillugit Naaja apeqquteqarpoq
Namminersorlutik Oqartussat neqeroortitsinerminni danskisut piumasaqaateqarnera inatsisinut naapertuunnersoq Naaja Nathanielsenip Naalakkersuisunut isummerfigeqquaa. Naaja Nathanielsenip aamma naammagittaalliornissamut periarfissaqannginnera apeqquteqarfigaa, minnerunngitsumillu aamma politikerip IA-meersup paaserusuppaa pisortat neqerooruteqartarnerannut tunngatillugu Naalakkersuisut namminneq piffisami matumani ingerlatseriaaseqarnertik naammaginartuusorineraat.
- Ilisimavara Naalakkersuisut ullumikkut neqeroorusiatik qallunaatuinnaq nassiuttaraat, taakkunani piumasaqaataasarluni akissutit taamaallaat qallunaatut nassiunneqartassasut aammalu suliffeqarfinnut neqerooruteqarusuttunut naammagittaalliorsinnaaneq periarfissaqanngivissortoq. Taamaattumik eqqumiigisassaanngitsumik paaserusuppara suleriaatsit taamaannerat Naalakkersuisut namminneq naammaginartuutissinnaaneraat, Naaja Nathanielsen Naalakkersuisunut apeqqutini tunngavilersorlugit taama allappoq.