Ulloq oqaluttuarisaanermi pingaarutilik: Nemo Thomsen nunatsinnit angutini siullersaalluni inuussutissarsiutigalugu isikkamik arsartartunngortoq
Nemo Thomsenip illoqarfini Ilulissat takorluukkani, kalaallinit allanit anguneqanngingajattoq anguniarlugu ukiualuit matuma siorna qimappaa.
Takorluugaa taanna maanna piviusunngorpoq.
Kalaallip nunanut allanut unammisartup FC Fredericia Brabrand IF-imit pisiarinnittoq ukiuni sisamani atuuttussamik tamakkiisumik isumaqatigiissuteqarfigaa. Taamaalilluni kalaallini angutini inuussutissarsiutigalugu isikkamik arsartartuni siullerpaalluni isumaqatigiissuteqalertuuvoq.
- Ulloq uannut ilaquttannut angisoorujussuuvoq. Tamakkiisumik isumaqatigiissusioqqaarnera nuannaarutigalugulu tulluusimaarutigaara, aamma kalaallini oqaluttuarisaanermi siulliunera angisoorujussuuvoq, Nemo Thomsen FC Fredericiap nutaarsiassamik saqqummiinerani oqarpoq.
Ilulissaneersoq saassussinermi isertitseriallaqqissoq
Nemo inuusuttuunermini SønderjyskE-mi aamma Kolding IF-imi arsareernermi kingorna Brabrand IF-imi angutini arsaatillaqqissutut saqqummerluaqqaarpoq.
22-nik ukiulik 2. divisionimi Brabrandimut angusarissaarfiusumik klubbip isertitsinerata pingajorarterutingajaannik tassa aqqaneq-marlunnik isertitsereerluni Fredericiamut nuuppoq.
FC Fredericiap Head of Recruitmentiata, Oliver Fredstedip saassussisartup isertitsillaqqissuunera Fredericiami aviisimit apersorneqarnermini immikkut erseqqissaatigaa.
- Nemo periarfissanik isertitsinissanillu angusaqarnissamut piginnaasaqarluarluni ukiuni arlalinni takutitsisimasoq saassussisartuuvoq. (..) Kajumissuseqarpoq, sukkasoorujussuuvoq, isertitsisinnaaneralu ersarilluinnarpoq, taakkulu avatangiisitsinniilernissaat qilanaaraarput.
'Qularinngisaannarparput'
Nemop ilaqutai nunatsinniittut nuannaarlutillu nuannaarnerup pianik qullilipput.
Nemop arnaata, Pilu Thomsenip isumaqatigiissuteqarnera ukiorpassuarni suliniuteqarluni sukataaruteqarnerata sakkortunerpaaffigigaa inoqatinut attaveqaatitigut nassuiaatigaa.
- Nemo inuutissarsiutigalugu arsartalerpoq, nukappiarannguullunili takorluukkani anguaa. Aningaasarsiutigalugu isikkaamik arsartartumut angajoqqaatut taasinnaalerpugut. Qanoq tulluussimaartiginerluta nassuiarneqarsinnaanngilaq.
Ilaqutariit ernermi piumassuseqarnera tunniusimaneralu qularutigisimanngisaannaraat taanna allappoq.
- Ernera ukiorpassuarni anguniagaqarnerit akilerpoq. Oqartuartarnitsitut maanna suli ilungersoqqissaatit. Unammillerneqarneq ilinnut nukittunerulersitsiuaannarpoq.
Taassuma holdip arsaattarfiannut apuunnertik misigissutitigut immikkut attortinnartoq oqaluttuaraa.
- Ullut kingulliit qulliit kuupput, Monjasa Parkimut isernerput immikkuullarippoq. Nunarput suut tamarmik aallartiffiat asasattalu najugaat soorunami eqqarsaatitsinniippoq.
Nunatsinnut tamarmut pingaaruteqartoq
Nunatsinnit nunanut allanut unammisartut isumaqatigiissut inummut ataatsimut iluatsitsinerinnaanani anginerusutut isigaat.
Nunanut allanut unammisartut sungiusaasuata, Morten Rutkjærip isumaqatigiissut 'kalaallit isikkamik arsartartut oqaluttuarisaanerannut' ilaanerarpaa, Nemo Thomsenilu kinguaariinnut nutaanut maligassiusunngussasoralugu.
- Kalaallit isikkamik arsartarnerani oqaluttuarisaanermi pingaaruteqarpoq, inuiannullu tamanut isumassarsititsiviussalluni.
Nunanut allanut unammisartut oqarnerat naapertorlugu inuussutissarsiutigalugu arsartartuuneq kalaallit inuusuttut takorluugaanni anguneqarsinnaanngitsuujunnaarpoq.
Tamatuma saniatigut nunatta avataani arsartartut arlallit angusarissaariartuinnartut aamma oqaatigaat. Mathias Mac Christiansen Norgemiut isikkamik arsartartuini Aalesundimi inissilluarpoq, Adam Ejler Hansenilu Malik Jensenilu Danmarkimi isikkamik arsarnermi aamma ineriartorlutik.
- Taakku ataatsimoorlutik kalaallit unammisartuini kinguaariit nutaat sinniisuuffigaat, kalaallillu piginnaasallit nunatsinni atugassarititaasunik tunngaveqarlutik nunani tamalaani qaffasissumik unammisartunut unammillersinnaanerannik takutitsipput, nunanut allanut unammisartut Facebookimi allapput.
Nunanut allanut unammisartut ineriartorneq tamanna taamaammat politikkikkut aamma kinguneqartitsiffiusariaqarsoraat.
Nunatsinnit inuussutissarsiutigalugu unammisartunik amerlanerusunik pilersitsissagutta atortorissaarutinut pitsaanerusunut ilaatigut aridomesinut arlalinnut meeqqat inuusuttullu ukioq kaajallallugu sungiusarfiusinnaasunut aningaasaliisoqartariaqarpoq.
- Nemo Thomsen qanoq angusaqartoqarsinnaaneranut uppernarsaatissaavoq. Nunatsinni Nemotut piginnaaneqartut piginnaasaminnik ineriartortitsinissamut atugassarititaasunik eqqortunik amigaateqaannartut qanoq amerlatiginersut apeqqutaaginnarpoq.
Nemo Thomsenip oqaluttuarisaanermi ilaalernerminit annerusumut tunngassuteqarsoraa:
- Siullerpaanera uannut pingaarnerpaanngilaq. Neriuppunga amerlanerusunik – aamma isikkamik arsarnerinnaanngitsumi aammali nunatsinni timersuutinit allanit – assinganik misigisaqarnissamut periarfissaqartoqarnissaa anguniakkaminnillu malitaqarnissaa neriuutigaara, Nemo Thomsen KNR-imut oqarpoq.
Alloriarnerup tullia
Nemo Thomsen FC Fredericiami divisionimi siullerni maanna arsartuni piginnaasanik maanna takutitsisussanngorpoq.
- FC Fredericiamiilernera nuannaarutigeqaara. Klubbi pitsaasuuvoq, aaqqissuussilluartoq avatangiisigissaartitsisorlu maaniinninnilu ineriartorluarsinnaanissara qularutiginngilara, klubbip attaveqatigiittarfianut oqarpoq.
- Holdimut suleqatigisaanullu aalajangersimasumik peqataalernissannut nuannaartorinnittunillu naapitsinissannut kajumissuseqarluarlungalu qilanaarpunga.
Nemo Thomsen isumaqatigiissuteqarnikkut nunatta oqaluttuarisaanerani ilaalereerpoq. Unammisarfimmi immikkoortup tulliani suliaqarnissaq maanna aallartippoq.
