Navalnyj nerisaqqilersoq

Ruslandimi illuatungiliuttut siuttuat, Aleksej Navalnyj, neriumajunnaarnermi kingorna nerisaleqqippoq ilaquttanilu attavigileqqissinnaallugit.

Russit nutaarsiassaqartitsiviat Tass taama allaaserisaqarpoq, tassani Ruslandip parnaarussiveqarfiinni pisortaq Alexander Kalashnikov issuarneqarpoq.

Navalnyj nalinginnaasumik nerisaleqqissimasoq 82 kilonillu oqimaassuseqartoq, taanna oqarpoq.

Navalnyj Ruslandimi timmisartumut siorna ilaatilluni toqunartutortinneqarpoq, kingorna Tysklandimi sivisuumik katsorsarneqareerluni Ruslandimut uterluni.

Navalnyj Ruslandimut februarimi utermat tigusarineqarpoq.

AAMMA ATUARUK Navalnyj-p suliniaqatigiiffiata suliani tamaasa unitsikkallassagai

Navalnyjmik tapersuisut inatsisartunut qinigassanngortinneqarsinnaannginnissaannik inatsimmik nutaamik atuutilersitsiniarlutik Ruslandimi inatsisartut siunnersuuteqarput.

Inatsisissatut siunnersuummut akerliusut ilagaat, Valery Gartung, partiimi Ruslandip naapertuilluinnartuunissanik suliuniuteqartumi Et Retfærdig Ruslandimi ilaasortaq.

Valery Gartung inatsisartuni marlunngornermi oqalugiarami ilaatigut ima oqarpoq.

- Tunngaviusumik inatsisinut atuuttunut naapertuutinngilaq, taamaattumik qanoq oqaassallunga taasissutigineqarnissaannulluunniit qanoq iliussanerlunga naluara, Valery Gartung oqarpoq.