Navalnyj-p suliniaqatigiiffiata suliani tamaasa unitsikkallassagai

Ruslandip præsidentianik Vladimir Putinimik isornartorsiuisup, Aleksej Navalnyj-p, suliniaqatigiiffiata suliani tamaasa unitsikkallassavai. Moskvami eqqartuussivik taama aalajangiivoq.

Navalnyj-p suliniaqatigiiffia ingasaassiniartuunersoq, Moskvami eqqartuussiviup aalajangiiffigissavaa.

- Ingasaassiniartutut sapaatit-akunnerata tulliani nalilissagunarpaatigut, kontogut tigusiffigeqqusaajunnaarsissallugit, alattoqarfigut matullugit, Navalnyj-p suleqataa Leonid Volkov Znak.com-imit sapaatit-akunnerata naanerani apersorneqarluni oqarpoq.

AAMMA ATUARUK Navalnyjip tapersersortai 100-nit ikinnerunngitsut tigusaasut

Suliniaqatigiiffiup suliani unitsikkallartariaqassagunarai, taassuma oqaatigaa, Putinimut illuatungiliuttut sulinerat siunissami qanoq iluseqassanersoq naliliiffigineqassalluni.

Præsident Vladimir Putinip qanimullu suleqataasa peqquserluttuliortuunerat tamanut ersersinneqarnissaa, Navalnyj-p suliniaqatigiiffiata ilaatigut suliniutigaa.

Navalnyj-p, Moskvamit kangimut illoqarfimmi Vladimirimi parnaarussaaqqasup, parnaarussaaqqanermini nakorsamit naammattumik ikiorneqarsinnaannginnera akerliuffiginiarlugu marsip ulluisa 31-anni neriumajunnaarpoq.

Aleksej Navalnyj-p, nakorsanit arlaannaannulluunniit attuumassuteqanngitsunit sullinneqarsinnaanissaa piumasaralugu, Ruslandimi nuna tamakkerlugu akerliussutsimik sapaatit-akunnerata siuliani pingasunngormat takutitsipput.