Pinngortitaleriffik tuttuni miluguffigisaminnut ilanngartuisunik nassaartoq
Piniartorpassuit tuttut neqaanni qaqorteqqasunut eqqaanarsinnaasunik, qaqortutut saattukujuutut isikkulinnik siumuisarsimanertik pillugu Pinngortitaleriffimmut 2017-imi ukiakkut saaffiginnissimapput.
Pinngortitaleriffiup tuttup neqaata misissuiffiginerani paasivaa miluguffigisaminnut ilanngartuisoq, Sarcocystis matumani pineqartoq.
Sarcocystis nunatsinni tuttoqarfinni ukunani Kangerlussuaq-Sisimiut, Akia-Maniitsoq, Ameralik aamma Qeqertarsuatsiaani ukiorpassuarni siumorneqartartuuvoq.
Aammattaaq tuttunniat tuttut neqaanni qaqortunik ammalortuaqqanik nassaartarsimanertik pillugu saaffiginnittarsimapput. Ammalortuaqqat taakku qumaarsussuup Taenia krabbei-ip manniliarai. Tamakku umimmanni aamma siumorneqarsinnaapput.
Nassaarineqartulli tassa Sarcicyster Taenia krabbei-llu inunnut tuniluuttarnerannik nalunaarsuisoqarnikuunngilaq.
Mianersortoqarnissaali pillugu neqit nujuartaneersut minnerpaamik 75° Celsius angullugu uunnanneqartarnissaat inassutigineqarpoq. Taamatut uunnaaneq uumasuaqqanik miluguffigisaminniittunik toqoraassaaq.
Sarcocysterit Taenia krabbei-illu silaannarmut nillertumut panertumullu tulluarsarsimammata neqinik qerititsineq, pujoorineq panertitsinerlu uumasuaqqanik toqoraaneq ajorput.
- Neqimik Sarcocysterimik tunillanneqarsimasumik nerinianngikkuit neqip isumannaatsumik iginneqarnissaa inassutigissavarput. Tamannalu ikuallaaneq aqqutigalugu pisariaqarpoq, Uumasunut Inuussutissanullu Oqartussaaffeqarfik allappoq
