Kalaallit Nunaata avataani inuiattut ullorsiorneq aamma nalliuttorsiutigineqarpoq.
Inuiattut ullorsiorneq Aalborgimi Kalaallit Illuanni aamma Aalborgip uumasuusivissuani malunnartinneqarpoq.
Inuiattut ullorsiornerup nalliuttorsiutigalugu malunnartinneqarnera pingaartinneqarpoq nuannarineqarlunilu.
- Inuiattut ullorsiortarneq kalaallit pingaartitorujussuaat, nammineerlutik inuiattut ullorsiortalernikuugamik ukiut 33-it matuma siornatigut, aamma tamanna kalaalliulluni nuanneqaqaaq, ullorsiortalernikuummata, kalaallit tamaviisa inuiattut ullorsiorneranni pilluaqquakka, Peter Joelsen Aalborgimi najugalik taama oqarpoq.
Helena Petersen Qaqortuminngaaneersoq ullumikkullu Aalborgimi najugaqartoq inuiattut ullorsiornerup nalliuttorsiutigineqarnera nuannaarutigaa,
- Kalaallit Nunaat Danmarkimi malugalulu nuannnerpoq. Soorlu tassa angerlarsimasutut misigisimalaarluni kaffillertoqarluni, angerlarsimasutut misigisimanarluni tamanna nuannaarutigaara, Helena Petersen oqarpoq.