Assi: Angu Motzfeldt

Nathanielsen: Nunarput qimaasunik aalajangersimasunik amerlassusilinnik tikisitsili

Inuit Ataqatigiit aningaasaqarnermut tunngasunut oqaaseqartartuat Naaja Nathanielsen partiimit tunuarpoq. Politikkikkut sulinini attaviittutut Inatsisartut upernaakkut ataatsimiinnerata naanissaata tungaanut aalluttussanngorpaa, ilaatigullu nunatta qimaasunik tigusinissaanik siunnersuuteqalerluni.

Inuit Ataqatigiinni ilaasortat ataatsimik ikilipput, aningaasaqarnermut tunngasunut oqaaseqartartuat Naaja Nathanielsen partiimit tunuarmat. Politikkikkut sulinini attaviittutut aalluttussanngorpaa.

- Aalajangernera ukiuni kingullerni parteerisannit allatut aalajangertarninnit kinguneqarpoq. Politikkimimi ilaatigut taamaattoqartarpoq, uangali pingaartitanni partiinnit isummertarnera allaanerusarsimavoq, Naaja Nathanielsen oqarpoq.

Naaja Nathanielsenip Inuit Ataqatigiinnit tunuarnini assigiinngitsunik peqquteqarnerarpaa. Ilaatigut Inuit Ataqatigiit siulittaasuata Sara Olsvigip ukiortaami oqaaseqaatimini ataatsimoortumik tapiissutit ukiumut 10 millionit koruuninik ilanngartarnissaannut siunnersuutaa isumaqatigisimanngilaa.

- Aningaasanut tunngasunut oqaaseqartartuuvunga, taamaattumillu aningaasanut tunngasunut partiitta isumaanut isumaqataananga ilaasortaaginnarsinnaanngilanga, Naaja Nathanielsen oqarpoq.

Læs også Naaja Nathanielsen IA-mit tunuarpoq

Naaja Nathanielsenip partiip inuiaqatigiissutsitsimik pingaartitsigaluttuinnarneranik taasaminut aamma akerliunerarpoq. Tamanna Inatsisartut upernaakkut ataatsimiinnerannut siunnersuusiorneranik kinguneqarpoq.

- Nunarput qimaasunik aalajangersimasunik amerlassusilinnik siunissami tigusisalernissamut danskit naalagaaffianut isumaqatigiinninniarnissaanik siunnersuuteqarniarpunga, Naaja Nathanielsen oqarpoq. 

Nunatta ukiut pingasut ingerlaneranni qimaasunik arfinilinnik tikisitsinissaa siunnersuutigaa.

- Nunatsinnit taamaaliorsinnaavugut, namminiilivikkusukkutta akisussaaffeqarluta aamma takutittariaqarparput, nunarsuarmioqatittalu suliaannut aamma ilanngulluta, Naaja Nathanielsen oqarpoq.

Inatsisartut upernaakkut ataatsimiinnerata kingorna politikkimit tunuarniarluni aaljangereerpoq, taamanikkussamullu taassuma Inatsisartuni inissisimaffia Inuit Ataqatigiinnut utissalluni.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat