Assi: KNR

Naaja Nathanielsen IA-mit tunuarpoq

Inuit Ataqatigiinni ilaasortat ataatsimik ikilipput, Naaja Nathanielsen partiimit tunuarmat. Politikkikkut sulinini attaviittutut aallukkallartussanngorpaa.

- Eqqarsaatigilluareerlugu ajuusaarutigaluguli nalunaarutigissavara Inuit Ataqatigiinnit ippassaq tunuarama, Inatsisartullu upernaakkut ataatsimiinnissaanni attaviittutut sulissagama. Upernaakkullu ataatsimiinnerup kingorna politikkimit tunuavissallunga.

- Partiimut allamut ilaasortanngornavianngilanga aamma politikkikkut isummakka allanngunngillat.

- Aalajangernera ukiuni kingullerni parteerisannit allatut aalajangertarninnit kinguneqarpoq. Politikkimimi ilaatigut taamaattoqartarpoq, uangali pingaartitanni partiinnit isummertarnera allaanerusarsimavoq, Naaja Nathanielsen tusagassiutinut nalunaarummi allappoq.

Aamma atuaruk IA: Sooq ilisimatuut innersuutaat malinneqanngillat?

Tunuarnini eqqarsaatigilluaqqaarlugu ajuusaarutigulugu nalunaarutigaa.

- Assigiinngissutsip akiornissaa suli pingaartitaraara, atugarissaannginnermiit atugarissaarnermut periarfissaqartitsinissaq annertusisarniarpara, inuiaqatigiit atasinnaasumik ineriartortikkusuppakka - nunamik pingaartitsineq aallaaviginagu inuilli aallaavigalugit. Tamakku takorluukkat, naalakkersuisuutitaqartut kingulliit marluk ingerlaneranni ajornerulersimasut isumaqarpunga, Naaja Nathanielsen oqarpoq.

Inuiaqatigiissutsitsimik pingaartitsigaluttuinnarneq

Inuiaqatigiit 'inuiaqatigiissutsimik pingaartitsigaluttuinnarnermik' taasaminut isornartorsiorpai, nunammi ineriartorneranut unissaatitut isigigamiuk.

- Nunarsuarmi kisimiittutut inuuginnarsinnaanngilagut, imaluunniit kikkunnit tamanit ikiorneqarnissamik namminerlu ikiuisariaqannginnermik naatsorsuuteqaannarsinnaanngilagut. Isumaqarpungalu isummagut ersarissartariaqarigut inuiaqatigiissutsimillu pingaartitsigaluttuinnarneq akiorlugu, oqarpoq.

Aamma atuaruk Aningaasanut inatsisip tamanit isumaqatigiissutiginissaanut millionialunnguit akornutaapput

Naaja Nathanielsenip Inatsisartut upernaakkut ataatsimiinnissaannut assigiinngitsunik siunnersuutissanik suliaqarpoq, taamaattumillu upernaakkut ataatsimiinnissap qaangiunnissaata tungaanut attaviittutut Inatsisartuni ilaasortaaginnassalluni.

Aningaasaqarnermut politikkimi Inuit Ataqatigiit siunniussaannut isumaqataannginnera ersarippoq, Inuit Ataqatigiillu aningaasanut tunngasunut oqaaseqartartorigallarmanni ataatsimoortumik tapiissutit 10 millionit koruuninik ilanngartarnissaannik isuma isumaqatigisimanngilaa.

- Nassuerutigisimavara Inuit Ataqatigiit takorluugaat isumaqatigisimannginnakku - taamaattumillu ilaasortaaginnarnissara pissusissamisoorsorinagu.

- Ersarissassavarali maanna naalakkersuisuutitaqartut allanit taarserneqaraluarpataluunniit tutsuiginartinnginnakkit, tassami nunarput siuttoqarani aqunneqaranilu asuli ingerlalernikuusoraara, oqarpoq.

Naaja Nathanielsenip tusagassiutinut nalunaarunni naggaserlugu partiimi ikinngutini qujaffigai.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat