Nassuttooq: Pinngortitamut eqqaannakkat suli pititsisut
![](/sites/default/files/styles/image_934x467/public/article_images/julius_lennert_assilisaa_10.jpg?itok=o7zTUfW7)
Umiatsiaaqqat, aquteralaat aamma piniariarnermi atortukorpassuit Avannaata, Qeqertallip immaqalu Qeqqata Kommunianeersut Nassuttuumut aavariartartut ukiaanerani suli siumortuartarpaat.
![](/sites/default/files/styles/image_934x467/public/julius_lennert_nassuttooq_2.jpg?itok=wqbEOThn)
Asseq: Julius Lennert
Ilutigitillugu Inatsisartuni ilaasortap, Kristian Jeremiassenip (IA), suli paaserusullugu ujartorpaa Nassuttuumi eqqakkat angisuut qimagaannarneqartarsimasut salinneqarnissaannut kina akisussaasuunersoq.
Namminersorlutik Oqartussaappat imaluunniit kommunit?
Tamanna taassuma Naalakkersuisunut §37 aqqutigalugu maanna apeqqutigisimavaa.
Naalakkersuisullu akissutaat naappoq ersarillunilu: Pinngortitami eqqakkanik saliineq kommuninit akisussaaffigeqarpoq.
Taama avatangiisinut tunngatillugu naalakkersuisuni akisussaasup, Kalistat Lundip (IA), Kristian Jeremiassenimut akissuteqarnermini naqissuserpaa.
![](/sites/default/files/styles/image_934x467/public/julius_lennert_assilisaa_8.jpg?itok=0CxoORXm)
Asseq: Julius Lennert
§37-kkut apeqqummut akissut
Kalistat Lund §37-kkut apeqquteqaammut akissuteqarluni ilisimatitsivoq pinngortitami eqqakkanik qimaannangaqarfiusuni saliisoqarnissaani kommunit allallu suleqatiginissaannut Naalakkersuisunit aallaaviatigut piareersimaffigineqartoq.
Aajuku Kristian Jeremiassenimut akissutaanit pingaarnersiukkat:
- Naalakkersuisut Avatangiisinut aningaasaateqarfikkoortumik aningaasalersuinissamut tapersiinissamut periarfissaqarput. Kommunit, suliffeqarfiit innuttaasullu Avatangiisinut aningaasaateqarfikkoortumik ukiumut ataasiarlutik tapersiiviginegarnissaminnik qinnutegarsinnaapput.
- Avatangiisinulli aningaasaateqarfimmi aningaasaatit killegarmata, taamaattumik Avatangiisinut aningaasaategarfimmiit saliinissamut tapersiineq, eqqakkatsinnik angerlaassinissamut tamatta pisussaaffeqarfitsinnik taarsiisinnaanngilaq.
- Naalakkersuisut aalisarnermut, piniarnermut aallaaniarnermullu atortunik annaasanut qimaannakkanullu suliniutissanut pilersaarut naammasseqqammerpaat. Suliniutissanut pilersaarummi ilaatigut erseqqissarnegarpoq, saliinissamut suliniutegamerit pitsaaliuinermik suliniutissanik atagatigiissinnegarnissaa pingaarutegartoq, taamaalilluta eqqakkat pinngortitamillertamerat sapinngisamik pinngitsoorsinnaassagatsigu.
- Suliniutissat taakkua ilaat, tassani suliniutissanut pilersaarutip saniatigut siunnersuutiginegartoq, tassaavoq nunami nammineq kajumissutsiminnik avatangiisini nakkutiginnittussanik, nunami atortunik annaasanik qimaannakkanillu saliinermi ikiuussinnaasunik, pilersitsinissaq.
Kristian Jeremiassenip Nassuttuumi avatangiisinik mingutsitsinermut tunngasoq oqallisigineqartussanngorlugu aatsaat saqqummiutinngilaa.
Siullermik tassunga tunngasumik ukiup appaata affaata matuma siorna saqqummiussaqarpoq. Taamani Kommune Qeqertalimmi kommunalbestyrelsimi ilaasortatut.
Kommune Qeqertalimmi borgmesterip, Ane Hansenip (IA), taamani oqaluttuaraa Kommune Qeqertallip kommunit sanilerisatik, Nassuttuumi piniariartarfimmik atuisartunik aamma innuttaqartut, suleqatiseriniarlugit attavigisimagai.
AAMMA ATUARUK Rensdyrjagtområde Nassuttooq skal ryddes op
Kisianni kommunit suleqatiserisimanerat borgmesterip kissaateqarsimaneratut pisimanngilaq.
- Kommunit sanilerisagut - atueqatigut - attaveqarfiginikuuvagut. Ilimagisatsinnit suliaq arriinneruvoq. Aamma taakkua soorunami akinissai utaqqineqartarmata. Upernassaq aapriilimi kingullermik saaffigineqarnikuupput. Ilaserineqarlutik Nassuttuumi salitassat sumiinnerisa nalunaarsoqatiginissaannut, Ane Hansen oqarpoq.
![](/sites/default/files/styles/image_934x467/public/julius_lennert_nassuttooq_3.jpg?itok=aUXdvqSZ)
Asseq: Julius Lennert
Eqqakkat, kangerlummut isorartuumut aavariartartut ukiut ingerlaneranni pinngortitamut qimagaannartarsimasaat, piniartarfinni assigiinngitsuni siammarsimapput nalunaarsorneqarsimanatillu. Tamannarpiarlu pissutigalugu Kommune Qeqertalimmut ajornakusoorsimavoq eqqakkat annertussusaasa nalunaarsornissaat.
- Ornillugumi misissoqqaartariaqarpoq igitat assartugassat sumiinneri nalunaarsorlugit. Pilersaarusiorlugillu sumut katersorneqassanersut. Minnerunngitsumillu aningaasat suminngaanniit pissarsiarineqassanersut, Ane Hansen oqarpoq.
Taassumami oqarnera naapertorlugu Kommune Qeqertalik Nassuttuumi saliinermi kisimi aningaasartuuteqartussaanngilaq, kommunit sanilerisamik innuttaat aamma tassani aavartarmata.
- Uagutsinnut pingaartorujussuunikuuvoq kommunini kisitta atuisuunnginnitta eqqumaffiginissaa, kommunit arlallit atuisuummata, tassalu aningaasartuutit uagutsinnit kisermaanneqannginnissaat. Atueqatitsinnik akileeqateqartariaqarpugut. Taanna aalajangiunnikuuvarput, oqarpoq.
![](/sites/default/files/styles/image_934x467/public/nassuttooq_asiaq_0.jpg?itok=H3ISeRSz)
Nassuttuup kujataatungaa Qeqqata Kommuniata avannamut killeqarfianiittoq, kangerluup avannaatungaa Kommune Qeqertalimmut atavoq. Assiliartaq: asiaq.gl.
Qeqqata Kommuniani, kommunitut Nassuttuup kujataatunganut avannamut killeqartumi, nuannaarutigineqarpallaanngilaq Nassuttuumi saliinissamut kommunimit allamit suleqatiserineqarsimaneq.
Borgmester Malik Berthelsenimmi (S) Kommune Qeqertallip saaffiginnissutaa tigusimanngilaa.
- Arajutsisaqarsimanngikkutta saaffiginnissut takunikuunngilarput, oqarpoq, nangillunilu:
- Saaffiginnissummik takkuttoqarpat nalilersorumaarparput, kisianni saliisoqarnissaanut uppersarneqartariaqarpoq kikkut pineqartuni tukassaallutik atuisuunersut.
![](/sites/default/files/styles/image_934x467/public/julius_lennert_assilisaa_9.jpg?itok=xf-RJTMO)
Asseq: Julius Lennert
Avannaata Kommunianiilli oqaloqatigiissinnaaneq ammaffigineqarneruvoq. Piumasaqaatitalimmilli:
- Ane Hansen siornatigut attaveqarfiginikuuara Ilulissat Avannaatungaani aalisariartarfimmi Torsukattammi saliniissaq pillugu. Aalisarfiummat kikkunnillu tamanit atorneqarmat aamma saliinermut peqataassasut, Palle Jeremiassen oqarpoq.
Taanna Avannaata Kommuniani borgmesteriuvoq attaviitsuullunilu.
AAMMA ATUARUK Avatangiisinut nersornaasiuttagaq aalisartunut tunniunneqartoq: Qassutit kimmikkaallu katersugaasa ilagigaat
- Isumaqarama eqqagassat tamatta akisussaaffigigigut. Naalakkersuisuungaluarutta imaluunniit kommuniungaluarutta tamatta akisussaaffigaagut, oqarpoq nangillunilu:
- Taamaattumik uani Nassuttooq eqqartorneqassappat saleeqataasinnaanissamut akuersissagutta aamma kommunit allat akuersisariaqarput aalisarfinni, kikkunni tamani atuiffiusuni, aamma saleeqataassallutik. Oqaloqatigiinnissamut ammavugut.
KNR-imit Aalisarnermut aamma Piniarnermut Naalakkersuisoqarfik paasiniaavigigaluarparput Nassuttooq kikkunnit piniarfittut atorneqartarneranut takussutissamik pissarsisinnaanerluta. Allaaserisalli uuma naammassinissaanut piffissaritaasup iluani akissutisinngilagut.