Demokraatit: Nassuiaatip utertinneqarnera paasinarpoq
Nassuiaat Inatsisartut ukiaanerani ataatsimiinneranni sapaatit-akunneranni matumani peerneqarpoq, danskisuuata kalaallisuuatalu assigiinngissuteqarnerat tunngavilersuutigineqarluni.
Tamannalu ajunngilluinnarpoq, Demokraatit politikkikkut oqaaseqartartuat Justus Hansen taama oqarpoq.
- Nassuiaatip utertinneqarnera paasisinnaalluarpara, Justus Hansen oqarpoq.
Tamannali illuatungiliuttuni isumaqatigineqanngilaq.
Aamma atuaruk Naalakkersuisut pilersaarusiaq oqallisigerusunngilaat
Nalunaarusiap ilaa Inuit Ataqatigiinnit naammaginartinneqanngilaq, taamaakkaluartoq ukiaq manna oqaluuserineqartussaajunnaarnera isornartorsiorpaat, ilaatigut ilungersunartunik imaqarmat, soorlu nunaqarfinnik matooraanissamik.
Demokraatillu Inuit Ataqatigiittulli imarisaa oqaluusererusukkaluarlugu nalunaarusiap utertinneqarnera tusaatissatut tiguaat.
Demokraatilli suli ippinnartoqartitsilaarput.
Nassuiaat marlunngornermi oqallisigineqartussaagaluarpoq Inatsisartunilu ilaasortanut agguaanneqareerluni, aamma juulip qaammataani tamanut tusarniaassutigineqarpoq.
Aamma atuaruk Nuna tamakkerlugu pilersaarusiaq Kim Kielsenip atortussaajunnaarsippaa
Taamaakkaluartoq aqagumut oqaluuserineqartussanngormat ullormut oqaluuserisassanit Kim Kielsenimit aatsaat peerneqarpoq.
- Eqqumiippoq, aamma sooq peerneqarnersoq Demokraatit Inatsisartuni ilaasortaatitaata tungaanit tupigusuutigaarput. Naalakkersuisulli tunngavilersuutigisaat tusaatissatut tiguinnartariaqarpagut, Justus Hansen oqarpoq.
Kim Kielsen naapertorlugu, Nuna tamakkerlugu pilersaarummut nassuiaat allanngortinneqareerpat naqqissorneqareerpallu 2017-imi saqqummiuteqqinneqassaaq.
