Nassiussineq akikinneruppat niuernerulissapput
Kalaallit Savalimmiormiullu Danmarkimi pisiniarfinnit taamaallaat aalajangersimasunit atisanik, skuunik pisiassanillu elektronikimut tunngasunik ullumikkut pisisinnaapput. Taamaattorli Nunatsinnut Danmarkimullu nassiussat akisunerujussuat pissutigalugu internetikkut niuerfiit tunuarsimaartarput. Tamannali iliuuseqarfiginiarlugu Post Danmarkip nassiussanut akit appartinniarpai.
Assersuutigalugu Nunatsinnut timmisartukkut nassiussat, 5 kiilu angullugit oqimaassusillit, 555 koruuninit 326 koruuninut appartinneqassapput, umiarsuakkullu nassiussat 250 koruuninit 163 koruuninut appartinneqassallutik. Taamaalilluni momsip Nunatsinni akilerneqartussaannginnera pissutigalugu, Danmarkimit internetikkut niuerneq akilersinnaasussaavoq.
Tamatumunnga peqatigitillugu Post Danmarkimit erseqqissarneqarpoq, Post Greenland suleqatigalugu nassiussat sukkasuumik ingerlateqqinneqartarmata, taamaalilluni pisiarineqartut Nunatsinni sumiikkaluaraanniluunniit - illoqarfinni annerniikkaluaraanni nunaqarfimmiluunniit minnerpaamiikkaluaraanniluunniit - pisiat nassiunneqartut sukkasuumik apuunneqartartut.
Agguaqatigiissillugu nassiussat Danmarkimit Nunatsinnut nassiunnerat, taamaallaat ullut pingajuat avillugu sivisussuseqartartoq, Post Danmarkimit oqaatigineqarpoq.