NASA Marsimit ujaqqanik tigusisimanini uppernarsaraa
USA-p avataarsualiartitsisarfiata NASA-p biiliata ungasianit aqunneqarsinnaasup "Perseverance"-p ujaqqanik Marsimit tigusisimanera NASA-p ataasinngornermi maanna uppernarsarpaa.
- Pisortatiguulerpoq! Ujaqqat qillerinikkut qaqitat ullorissamit angalasumit siulliit qaqinneqarput, NASA nammineq "Perseverance"-p Twitterikkut quppernerani allappoq.
AAMMA ATUARUK Robotti Marsimut pilersaarutit malillugit nunnittoq
Ujaqqanik qillerilluni septembarip aallaqqaataani qaqitsisoqarpoq, biililli ungasianit aqunneqarsinnaasup ujaqqat ilumut qaqissinnaasimanerai NASA-p qulakkeerlugu aallaqqaammut oqaatigisinnaasimanngilaa, assit ersernerlussimammata.
Ujaqqalli qillerilluni qaqinneqarsinnaasimasut assit nutaat ersarinnerusut takutippaat. Ujarak qaqinneqartoq aqerluussamit anginerulaarpoq, ruujorillu iluanut isumannaarlugu toqqorneqarsinnaasimalluni.
Biili ungasianit aqunneqarsinnaasoq, "Perseverance", Marsimut ukioq manna februaarimi qaammatini 22-ni ingerlaareerluni apuuppoq.