Robotti Marsimut pilersaarutit malillugit nunnittoq
Avataarsualiartitaq Marsimut ajornaquteqanngitsumik nunatta nalunaaqutaa naapertorlugu ippassaq sisamanngornermi unnukkut arfininngulersoq nunnittoq, avataarsualiartitsinermi aqutsisoq Swati Mohan uppernarsaavoq.
Avataarsualiartitalli Marsimut nunninneranit assit nunarsuarmut nassiunneqartut 11 minutsinik ingerlaareerlutik aatsaat nunarsuamut anngupput.
Biilip robottip "Perserverance"-p Marsimi uumassuseqarnersoq ukiuni tulliuttuni misissussavaa.
AAMMA ATUARUK NASA Marsiliartitsinissamut nunatsinni piareersartoq
Robotti ulluunerani taamaallaat ingerlaartarsinnaassaaq, unnuaanerani qiianarpallaartarmat. Taarsiullugu ujaqqat qaarsuillu nalaanni unnuaanerani uninngasassalluni, ujaqqat qaarsuillu taamaalinerani misissortassallugit.
"Perseverance" Jezerop kraaterianut nunnippoq. Kraaterip taassuma imeqarnissaa sermeqarnissaalu ilimagineqarpoq, uumassuseqaratarsinnaaneranik misissuiffiusinnaalluni.
Biili ungasianit aqunneqarsinnaasoq, Perseverance, Marsimut avataarsualiartitani nunnittuni aatsaat tallimaraat. Siulleq 1997-imi nunnippoq, USA-lu nunninnerit maannamut tamaasa isumagisimallugit.
