NASA Marsiliartitsinissamut nunatsinni piareersartoq
Nuup eqqaani Isuani qaqqanit pisoqqanit qaarsut nunat tamalaat aappaagu Marsiliartitsinissaanut piareersarnermut pingaaruteqarput, Weekendavisen taama allaaserisaqarpoq.
NASA-mi ilisimatuut, ingeniørit nunarsuup uumassuseqaqqaarneranik ilisimatuut nuimanerpaat, Minik Rosing ilanngullugu, nunarsuarmi uumassuseqartut siulliit malunnaataannik misissueqqinniarlutik Isuaniipput.
Minik Rosingip Nuup eqqaani Isuani qaarsuni nassaani, ilisimatusarnermi aqqutissiuussisoq, 1999-imi saqqummiuppaa. Nassaarineqartut tassaapput kulstofimik uumassussilinnit aallaaveqarsinnaasut, 3,7 milliardit missaannik pisoqaassuseqartut.
Australiamiup, Abigail Allwoodip annat ujarannguunnikut, stromatolittinik taaneqartartut, 2006-imi saqqummiuppai. Stromatolittit 3,5 milliardinik pisoqaassuseqarput Australiamilu nassaarineqarlutik.
Allen Nutmanip stromatolittit, 3,8 milliardit missaannik pisoqaassusillit 2016-imi saqqummersippai, taakku Isuani nassaarineqarput. Nassaarineqartulli Minik Rosingimit Abigail Allwoodimillu apeqquserneqarput.
Stromatolittillu nassaarineqartartut isumaqatigiinngissutigineqartarnerat NASA-mit ilisimatuut ujarassiuullu Kalaallit Nunaannut katersuutsitsisariaqarneranut ilaatigut pissutaavoq
Stromatolittit Marsimi ujaarineqarnissaat ilaatigut pilersaarutaavoq.
AAMMA ATUARUK Ilisimatuut uumassusilinnik pisoqarujussuarnik nassaaqqittut
Isuaniinneranni takussutissanik nutaanik nassaarnissaq siunertaanngilaq, ilisimatuulli robotit Marsimiit sunik inernerusunik nunarsuatsinnut nassiussinnaasassaanut piareersarniarneqarput. Ilisimatuut uumassuseqaleqqaarnermi pissutsit qanoq ittuusimanerat, suut misissorniarneqassanersut takusallu suunerat sapinngisamik isumaqatigiissutiginiassavaat.
Qangarsuaq uumassuseqarneq isumaqatigiinngissutaasoq
Tassami siusinnerusukkut inuunerusimasumik misissuisut nuimasut tamarmik immikkut ilaatigut Isuani nassaatik pillugit isumaqatigiippallaanngillat.
Oqallinnerillu taamaattut Marsiliartoqarneranut atatillugu pinaveersaarniarneqarput. Marsimummi angalaneq ungasippoq akisullunilu asserlu isiginnaagaq qanga uumassuseqarnermut ersiutaanersoq isumaqatigiinngissutigileraanni uterfigilaaginnarneqarsinaanngilaq.
AAMMA ATUARUK Nunarsuarmi ujarannguunnikut pisoqaanersaat Nunatsinni nassaarigaat
Taamaammat ilisimatuut Isuanut angalanerat uumassuseqarsimanermut ersiutit pillugit isumaqatigiilersinnaanermut tunngavoq. Isumaqatigiivittoqanngitsorli, Minik Rosing Weekendavisenimut oqarpoq.
- Takusattali suunerat ilisimalissallugu pingarnerpaavoq, taanna oqarpoq.
NASA-p robotiutiminik 2020-mi Marsiliartitsinissaa aappaagu juulimut aggustimulluunniit pilersaarutaavoq, taannalu Marsimut 2021-mi februaarimi tikinnissaa naatsorsuutaalluni.
