Narsíngátak atsiornernik katersiniartoq: Imigassat aalakoornartortallit matuneqaqqinnissaanik
28-inik ukiulik Narsíngátak Kúko, Tasiilami innuttaasoq imigassamik matusigallarnissamik noqqaalluni atsiornernik katersinissaminik sulissuteqarpoq.
Taassuma Tasiilami imigassap ammaqqinneqarnerata kingorna marlunngormat innuttaasunut ataatsimiitsitsisoqarnerani isumaginninnermi pigaartut ullut marluk ingerlanerinnaani 42-riarlutik orniguttariaqarsimasut paasigamiuk iliuuseqartariaqarsorisutut misigisimavoq.
- Tassani peqqutaavoq marlunngormat innuttaasunut ataatsimiitsitsisoqarmat kisitsisit saqqummiunneqartut amiilarnarnermut, tassani saqqummiunneqarput imigassap ammaqqinneraniit socialvagtit ulappussimasut taakku saniatigut peqqinnissaqarfik politiillu ulapputingaatsiarsimammata, Narsíngátak Kúko oqarpoq.
Sumiginnaaneq ersarittoq
Tasiilami septembari aallartisimatsiartoq inuit akileraarutinik utertoorlutik akissarsinerisa nalaani eqqissiviilliortoqangaatsiarmat imigassat aalakoornartortallit sapaatini akunnerni marlunnik matoqqatinneqarallarput.
Taamani politiit peqqinnissaqarfiillu artukkerneqarlutik anersaartortinneqarnissaminnik pisariaqartitsillutik taama noqqaassuteqarput.
Maannali meeqqat taama amerlatigisut sumiginnarneqartillugit matusineq pisariaqartoq Narsíngátak Kúko isumaqarpoq.
AAMMA ATUARUK Tasiilami innuttaasunik ataatsimiititsineq: Imigassarsisinnaaneq 21-nik ukiulinnut killilerneqarusuppoq
- Aap, nalunngikkaluarparput ajornartorsiut imigassamiinngitsoq kisianni aamma nalunngilarput tunumi imigassaq atorneqaraangat killissanik qaangiinerit pisarmata, Narsíngátak Kúko oqarpoq nangillunilu:
- Imigassamik matusagalarnissami tassani siunertaavoq taava Tasiilamut orniguttoqarnissaa ikiuiartortunik soorlu tarnip pissusianik ilisimasalinnik allanilluunniit kartsorsaasunik, innuttaasunut iluaqutissanik.
Tasiilami imigassat aalakoornartortallit arfininngornermi septembarip ulluisa 18-ianni ammaqqinneqarneraniit ullut marluk ingerlanerinnaani isumaginninnermi pigaartut 42-riarlutik ornigussimasut Kommuneqarfik Sermersuup KNR-imut uppernarsarpaa.
Tamannalumi Tasiilami aqqusinermi takuneqarsinnaasoq Narsíngátak Kúko oqaluttuarpoq.
- Illoqarfiup iluani takussaqaat taakku sumiginnakkat, aamma illoqarfiup iluani unnukkut meeqqat ukiukitsut suli aneertut takussaasaqaat.
Taassuma ilanngullugu KNR-imut oqaatigaa innuttaasut allamik siunnersuutissaqarunik ammaffigilluinnarlugit. Meeqqalli sumiginnakkat taama amerlatigitillugit angajoqqaaq allalluunniit meeqqamut akisussaasuusut ikiorneqarnissaminnik pisariaqartitsisut ikiorneqarnissaat Narsingatak Kukop angorusuppaa.
