Narsarsuarmiut siunissartik pillugu tapersersorneqarnissaminnik ujartuisut

Narsarsuarmi Kangerlussuarmilu atlantiku ikaarlugu mittarfiit siunissaat nalorninarpoq. Taakkumi mittarfiliortiternissat pillugit misissueqqissaarnermi qulimiguulinnut mittarfinngortinneqarnissaat periarfissatut tikkuarneqarmat, peqatigisaanillu Qaqortumi suluusalinnut mittarfeqalerneratigut Narsarsuarmut timmisartuussinerpassuit pisariaarutissammata.
 
Tamanna Kangerlussuarmi Narsarsuarmilu suliffippassuarnik annaasaqarfiussaaq, tamannalu nunaqarfinni marluusuni ernumalersitsivoq.

AAMMA ATUARUK Nalorninartorsiorneq malugaarput

Qaqortumi mittarfiliortoqarnissaanik aalajangertoqarmalli Narsarsuarmi nunaqarfiup ataannarnissaanut periarfissanik allanik ujartuisoqalerpoq, kommunimilli tapersersuisoqarsimanngilaq, nunaqarfimmi aqutsisut taama isumaqarput.
 
- Suliniutaagaluit ingerlaqqissimanngimmata, maannamullu 2017 naalersoq decembarimi isumasioqqinnermi suleqatigiissitsisunik pilersitsereernerup kingorna suli maannamut aamma tigussaasumik tigusaqannginnerput imaluunniit ingerlaqqinniarteqannginnera tassani assut tapersersorneqanngittutut aamma misigisimavugut, Mouritz Karlsen taama oqarpoq.
 
Taamatulli isornartorsiuisoqarnera Kommune Kujallermi borgmesterip tulliata siulliup Simon Simonsenip paasisinnaannginnerarpaa.

AAMMA ATUARUK Mittarfissuaqalerpat nunaqarfiit inuerutiimissasut

- Ersarissorujussuarmik oqaatigiuarsimavarput, tassa Narsarsuup ingerlaannarnissaa aammalu nunaqarfittut piujuaannarnissaa taanna uagut kommunalbestyrelsiminngaanniit aalajangiusimagipput. (...) Taamaammat soqutigilluinnaqqissaarparput aammalu tapersersorlugu Narsarsuup  siunissami aamma nunaqarfittut ingerlaannarnissaa mittarfittaaraluaruttaliinniit maani Qaqortumi, Simon Simonsen taama oqarpoq.
 
Nunaqarfiilli mittarfeqarfiusut aappaanni, Kangerlussuarmi, paarlattuanik isumaqarput Qeqqata Kommunianit tapersersorluarneqarlutik, nunaqarfimmi aqutsisut siulittaasuat, Laila K Thomassen, taama oqarpoq.
 
- Qeqqata Kommuniata mittarfeqarfiunerata ingerlaannarnissaa kissaatigisorujussuuaa. Taamaammat misigisimanarpoq tapersersorluarneqarluta aamma piujuaannarnissaa, Laila K Thomassen, taama oqarpoq.

AAMMA ATUARUK Mittarfiliortiternerit nutaat milliard koruuninik sipaaruteqarfiussasut missueqqissaarnermi inerniliunneqarpoq