Narsarsuarmi inuussutissarsiorfissanik periarfissarsiortut

Narsarsuup siunissaa ulluni makkunani pilersaarusiorneqaleruttorpoq.

Narsarsuarmi igutsaat tungusunnitsuliorfeqalissava? Juullimi pinnersaasiorfeqalissava? Nerisanut akoorutissanik naasunillu naatitsiveqalissava? Narsarsuup siunissaa pillugu nunaqarfimmi innuttaasut isumassarsiaat, innuttaasut sisamanngormat ataatsimiitinneqarmata oqallisigineqartunut tamakku ilaapput.

Ataatsimiinnermi innuttaasut 60-it missaanniittut peqataapput.

Isumassarsiat nunaqarfimmi innuttaasut junimi nunaqarfiup siuissaa pillugu isumasioqatigiinnerani saqqummiunneqarput. Kommune Kujallermilu borgmesteri Stine Egede IA-meersoq Narsarsuup siunissaa pillugu isumalluarpoq.

Taassumami naliliinera napertorlugu isumasioqatigiinneq isumallualersitsivoq.

- Innuttaasunik ataatsimiititsineq pitsaasumik ingerlanneqarpoq, innuttaasut periarfissaannik ikiorniaratsigit isumaqataagamik, taanna oqarpoq.

Ikaartarfimmik nutaamik pilersitsinissaq salliutinneqassasoq

Suleqatigiissitaliaq Narsarsuarmi inuussutissarsiorfissatut periarfissanik ineriartortitsiffiusinnaasut pillugit apriilimili sulilerpoq. Taama sulineq Qaqortumi mittarfiliornissamik aalajangernerup malitsigaa.

Narsarsuup siunissaa pillugit suleqatigiissitaliaq sinniissuutitaqarpoq, Kommune Kujallermit, Ineqarnermut Attaveqaasersuutinullu Naalakkersuisoqarfimmit, Mittarfeqarfinnit, Innovation South Greenlandimit, Kalaallit Nunaanni sulisitsisunit kiisalu Savaatillit Peqatigiiffiit Suleqatigiissunit.

AAMMA ATUARUK Naalakkersuisut: Narsarsuaq qanoq atorneqassava?

Borgmesterip oqarnera naapertorlugu, Narsarsuup ineriartortinneqarnissaanut ikaartarfimmik nutaamik Narsarsuup timaani pilertsinissaq salliutinneqassaq.

- Ikaartarfimmik nutaamik pilersitsinissaq salliutipparput. Ikaartarfimmik nutaamik pilersitsisoqanngippat Narsarsuup soqutigineqarnerata siunissami annikinneruleriartornissaa ernummatigaara... Taamaassappat ineriartortitsisoqarsinnaanissaa qularnarnerulissaaq, Stine Egede oqarpoq.

Nutaamik ikaartarfiliorneq millionerpaalunnik akeqassangatinneqartoq, borgmesteri ilisimatitsivoq. Pilersinneqarpalli takornariaqarnerulissasoq, taanna isumaqarpoq:

- Ikaartarfik Narsarsuup nunataata Qassiarsuullu timaatungaanut aqqutaalissaaq, soorluttaaq aqquserngup Qajiittap tungaanut ineriartortinnissaanut siorna aningaasaliisugut.

Narsarsuup siunissaa ukiorpassuarni oqallisaasoq

Narsarsuup siunissaa pillugu ukiuni kingullerni oqallittoqartarpoq. Suleqatigiissitap sulinera, pilersaarutit naapertorlugit, aappaagu 2023-mi naammassineqassaaq.

- Ukiuni kingullerni 30-ni suleqatigiissitarpassuaqarsimavoq, suleqatigiissitarlu una suleqataaffgisara siorna apriilip qaammatani aallartippoq. Suliassallu ilaat ukioq 2023 qaangiunnerani suliarineqarsinnaanerat qularutiginngilara. Suliassarmi tamanna Naalakkersuisunut uagutsinnullumi immikkuullarilluinnarlunilu nutaajuvoq, Stine Egede oqarpoq.

Suleqatigiissitani ukiuni kingullerni 30-ni suleqataasimallutikt oqarputit. Qanoq iliorniarpit suliap naammassineqarnissaanut?

- Suliarput naammassissavarput, tassa taamaaginnarpoq. Ukiorli taama oqareerpunga. Suliassaq una suliarissavara naammassiumaarparalu, Stine Egede oqarpoq.

Ineqarnermut Attaveqaasersuutinullu Naalakkersuisoq Erik Jensen innuttaasunik ataatsimititsinermut aamma peqataavoq.