Narsarsuaq ukiunik 70-inngortorsiorpoq
Narsarsuarmi akunnittarfik nunaqarfiup innuttai sinnerlugit ippassaq unnukkut nerisoqarpoq.
Tallimanngornermi timmisartunut eqqussisarfimmi Ole Kristiansen nipilersoqataalu nipilersussapput arfininngornermilu innuttaasunut Klubbimi sammisaqartitsisoqassalluni. Nalliuttorsiualaarnissamut suleqatigiissitat, nalliuttorsiornissamut aaqqissuisuupput tallimanngornermilu nipilersornissamut inuit 500-600-t missaat tusarnaariassangatinneqarput.
Nalliuttorsiualaarnerit ualikkut aallartinneqarput, Amerikamiullu erfalasuat amuneqareermat oqalugiartoqarlunilu kaffillertoqarpoq. Nalliuttorsiualaarnissamut suleqatigiissitap siulittaasua Narsarsuarmilu Katersugaasivimmi pisortaq, Ole Guldager ornigussimasorpassuarnut tikilluaqqusivoq Narsarsuullu oqaluttuassartaa oqaluttuaralugu.
Aammattaaq borgmesterip Simon Simonsenip nunaqarfimmiunut 160-iusunut Narsarsuaq najoruminartunngortissimammassuk qujassuteqarfigai, nunaqarfiullu meerartai 5.000 koruuninik tunissuteqarfigalugit.
Nalliuttorsiualaarneq nangillugu mittarfik, katersugaasivik napparsimmaveqarfiusimasorlu takuniarneqarput kingornatigullu Narsarsuaq pillugu filmeeraliat nammineq immiussat 60-kkunneersut takutinneqarlutik.