Narsarsuaq ukiunik 70-inngortorsiorpoq

Narsarsuarmi akunnittarfiup Amerikamiunit pilersinneqarsimasup ilaatigullu sakkutooqarfiunerata nalaani sakkutuujusimasut eqqaaniarlugit 70-iliilluni nalliuttorsiulaarluni nerersuaqatigiinnermut inuit 200-t missaat peqataapput. Nalliuttorsiualaarnerit tallimanngorpat arfininngorpallu nanginneqassapput.
Allattoq Gedion Storch
juulip 07-at 2011 14:57

Narsarsuarmi akunnittarfik nunaqarfiup innuttai sinnerlugit ippassaq unnukkut nerisoqarpoq.

Tallimanngornermi timmisartunut eqqussisarfimmi Ole Kristiansen nipilersoqataalu nipilersussapput arfininngornermilu innuttaasunut Klubbimi sammisaqartitsisoqassalluni. Nalliuttorsiualaarnissamut suleqatigiissitat, nalliuttorsiornissamut aaqqissuisuupput  tallimanngornermilu nipilersornissamut inuit 500-600-t missaat tusarnaariassangatinneqarput.

Nalliuttorsiualaarnerit ualikkut aallartinneqarput, Amerikamiullu erfalasuat amuneqareermat oqalugiartoqarlunilu kaffillertoqarpoq. Nalliuttorsiualaarnissamut suleqatigiissitap siulittaasua Narsarsuarmilu Katersugaasivimmi pisortaq, Ole Guldager ornigussimasorpassuarnut tikilluaqqusivoq Narsarsuullu oqaluttuassartaa oqaluttuaralugu.

Aammattaaq borgmesterip Simon Simonsenip nunaqarfimmiunut 160-iusunut Narsarsuaq najoruminartunngortissimammassuk qujassuteqarfigai, nunaqarfiullu meerartai 5.000 koruuninik tunissuteqarfigalugit.

Nalliuttorsiualaarneq nangillugu mittarfik, katersugaasivik napparsimmaveqarfiusimasorlu takuniarneqarput kingornatigullu Narsarsuaq pillugu filmeeraliat nammineq immiussat 60-kkunneersut takutinneqarlutik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq