Narsami toqoraaviup aatsitassarsiortoqalernissaa pissutigalugu atuisoqarunnaarnissaa ernumassutigigaa
Narsami illoqarfiup suliffeqarfik annerpaartaat ilaat tassa – toqoraavik Narsap umiarsualivianiippoq.
Toqoraaviup Neqip savat 20.000-it missaanniittut nunatta kujataani savaateqarfinneersut siorna toqorarpai.
AAMMA ATUARUK Avatangiisinut illersuiniaqatigiiffiit 141-t Kuannersuarni aatsitassarsiulersaarnermut akerliusut
Aatsitassarsiutileqatigiiffik, Greenland Minerals Kuannersuarni Narsamit 6 kilometerinik ungasissuteqartumi aatsitassarsiulersinnaassappat savanik toqoraavik ingerlatsiinnarsinnaassanersoq toqoraaviup ernumassutigaa.
Kuannersuarni aatsitassarsiulersaarneq pillugu paasissutissat:
- Kuannersuit Narsap kilometerinik 7,5-inik ungasitsigisumi avannarpasissortaaniippoq.
- Aatsitassarsiorfik asimi 700 meterinik qutsitsigisumiipppoq.
- Greenland Mineralsip aatsitassarsiorfk ukiuni 37-ni piiaaffiginiarpaa.
- Aatsitassarsiorfiup piiaaffigineqarnerani nunaqavissunik 328-nik suliffissaqartitsisoqarsinnaassasoq naatsorsuutigineqarpoq.
- Aatsitassarsiorfik qaqutigoortunik ilaatigut uranimik thoriumimillu saffiugassaqarpoq.
- Aatsitassarsiorfik saffiugassiassamik ukiumut millionit tonsit pingasut missaannik piiaaffiusassaaq.
- Ukiuni 37-ni aatsitassarsiornermit sinnikut 111 millionit tonsiussapput qaarsorlu (qaarsumit piiarneqartumit sinnikut ) 111 millionit tonsiussalluni.
Tusarfiit: Pinngortitaleriffik aamma Nationalt Center for Miljø og Energi, IPN-iliaq.
Aatsitassarsiorfimmit aatsitassat qaqutigoortut aamma uranip piiarneqarnissaa pilersaarutaavoq. Taamammat Neqip pisortaata sumiiffik ”uraneqarfittut” inuiaqatigiinnit naqissuserneqarnissaa ernumassutigaa.
- Nioqqutissaatitsinnut kinguneqassannginnera toqqissisimassutigaara. Aatsitassarsiorfimmit mingutsitsisoqarnissaanut assersoqqavugut, aatsitassarsiortoqassappalli nioqqutissaatitsinnit pisinissamut suli toqqissisimasoqassanersoq aarleqqutigaarput, Neqip pisortaa, Ole Vestergaard oqarpoq.
Sulisut aalajaatsut tigussaajuaannanngillat
Toqoraaviup illoqarfimmi sulisussat pillugit aatsitassarsiorfillu unammilernissartik qilanaarinngilaa.
Toqoraavimmi atorfiit tamarmik suliaqarluarfiup nalaani tassa septembarimit oktobarimut innuttalerniarnissaat ajornakusooreerpoq.
AAMMA ATUARUK Kuannersuit qanittuanni nersutaatilik: Greenland Mineralsilu isumaqatigiissuteqanngilagut
Illoqarfimmilu aatsitassarsiorfeqalissappat tamatumalu suli ajornakusoornerulernissaa pisortap ernummatigaa.
- Sulisut pitsaasut aalajaatsullu tigussaajuaannarneq ajorput, taamaammat immaqa piginnaanernik eqqortunik sulisoqaannarsinnaassanngilagut, Ole Vestergaard oqarpoq.
Taassuma nammineq sulisumilu peqqissusaat ernumatiginerpaavaa. Suliniut oqaatigineqartutut qularnaatsiva aperivoq, savaatillu peqatigiiffiata ernumassutaatulli ernumassuteqarluni.
Peqatigiiffik 70-inik ilaasortaqarpoq, taakkulu aatsitassarsiutileqatigiiffiup aatsitassarsiorfimmit pujoralaat uninngatiinnarsinnaassagaat ilimaginngilaat.
- Pujoralak eqqarsaatigalugu pujoralak killilersorsinnaanavianngilaat, Savaatillit Peqatigiiffiit Suleqatigiissut siulittaasuat, Lars Nielsen oqarpoq.
Narsami toqoraavimmi piffissaq tamakkerlugu sulisartut 35-t missaanniipput, toqoraavillu 2013-imi 60 millionit koruuninut nutarterneqarpoq.
