Narsami aallaasersortoq
Narsami sapaatip-akunnerata siuliani sisamanngornermi apriilip aqqaneq-aappaanni erngunneq ajorluinnartumik naggaserneqarpoq. Arnap 23-nik ukiullip qoorortooq tiguaa angullu 30-nik ukiulik ikilerlugu.
- Suli naluarput aallartoornerunersoq imaluunniit piaaraluni pisimanersoq. Aallaat arlaannik ajoquteqarsimanersoq maanna misissortipparput, Qaqortumi politiit pisortaat Bent Ole Kleist KNR-imut oqarpoq.
Aallaasersorneq inissiat arlaanni pivoq inuusuttut arlallit erngunneranni. Ataasiarluni igeriartoqarpoq angullu 30-nik ukiulik ajoralurtumik tassani ikilerneqarpoq. Angut taanna maanna Nuummut aallaruneqareerpoq.
- Erngunerup nalaani kamaattoqarsimanngilaq. Paasiniaanerput suli ingerlapparput qanorpiaq pisoqarsimanera paasiniarlugu, Bent Ole Kleist oqarpoq.
Arnaq 23-nik ukiulik Narsap eqqartuussiviani tallimanngornermi sassartinneqarpoq sapaatit akunneri sisamat tigumigallagassanngortinneqarluni. Persuttaasimasutut unnerluunneqarpoq.