Naqqiissut: Aqqartartoq pillugu saqqummersitaq peerneqartoq
Aaqqissuisoqarfimmi sulisut arlallit assit pineqartut ikkunneqarsimasut peerneqannginnerini takuneqarput.
Tassunga atatillugu saqqummiunneqartumi, aamma ilanngutassiami takuneqarsinnaasoq, assi umiarsuaq alapernaarsuut Vædderenimit assilisaavoq, saqqummersinneqareersuullunilu.
Illersornissaqarfimmi sulisoq Facebookimi quppernermini sapaatip akunnerata naanerani saqqummersitsivoq.
Saqqummersitaani assit silaannarmit assilineqarsimasut, kiisalu umiarsuup alapernaarsuutip, Vædderenip annaassiniarnermi ikiuuttup qaanit assilisat takuneqarsinnaapput.
Nutaarsiassaqartitsivimmi sulisut arlallit saqqummersitaq peerneqannginnerani takuaat.
Inoqatinullu attaveqaammi Redditimi saqqummersitaaneersut assit ilaat takuneqarsinnaapput.
Issittumi Sakkutooqarfiup aqqartartoq aqqartartut assigiinngitsut Virginiamik taaguuteqartut ilaanneersuusoq paasissutissiissutigaa.
KNR-ip Issittumi Sakkutooqarfik oqaaseqartinniarlugu attavigaa.
Saqqummersitaq sooq peerneqarsimanersoq, kina aalajangiisuusimanersoq kiisalu Issittumi Sakkutooqarfiup naalakkersuisut, nunanut allanut naalakkersuisoqarfik imaluunniit Illersornissamut ministereqarfik aqqartartoq pillugu saqqummersitamik Facebookimit peersinissamut atatillugu attaveqarfigisimaneraat apeqqutigaarput.
Issittumi Sakkutooqarfiup saqqummiisoqarsimanersoq, imaluunniit taanna peerneqarsimanersoq toqqaannartumik akissuteqarfiginngilaa.
Taakkuli saqqummersitamik taama ittumik nassaassaqanngitsoq allappaat.
- Illersornissaqarfiup pisortatigoortumik attaveqarfiini pisumit assinik tamanut saqqummersitsisoqanngilaq. Paasissutissanik allanik ilanngussassaqanngilagut, Issittumi Sakkutooqarfik allappoq.
Allaaserisap kingorna Illersornissaqarfik KNR-mut saaffiginnippoq oqaatigalugulu assit Illersornissaqarfimmi sulisumit assilineqarsimasut.
KNR-ip Illersornissamut ministereqarfik oqaaseqartinniarlugu suliaqarpoq.
