Naqitsiniissaffik qaangiuppat silagississaaq

- Tamanna naqitsiniisaffimmik ingerlaartumik Ikersuaq Davisikkoorluni Kalaallit Nunaata kitaanukartumik peqquteqarpoq. Naqitsiniisaffik taanna naliginnaasumik Kalaallit Nunaat kujaqquttaraluarpaa, maannali kitaata sineriaa tamaat aqqusaarpaa nittaatitsilluni, anorersuartitsilluni, kiatsitsilluni aqqusinernillu quasatsitsilluni aammalumi inuppassuarnut ajornartorsiortitsilluni, Steen Hermansen taama oqarpoq.

Tamannali maanna allanngulerpasippoq.

- Aap, silassaq qujanartumik unerisimanerulertussatut isikkoqarpoq. Imaanngitsoq nillertissasoq piffissarluunniit tamaat unerisimalissasoq.

Silallu allanngornera nunatta kitaani aqagumiit malugineqarsinnaaleriissaaq:

- Kitaata sineriaani aqagumiit silagississaaq. Naqitsiniisaffiullu tullia taama sakkortutiginiarpasinngilaq. Taamaattumik isumaqarpunga ajornersaa, tassa apinerujussua qaangiuttoq silalu unerisimanerulissasoq.

Ittoqqortoormiini nuiaannassaaq, avannamik anorsarippoq anorersuannguuttartumillu natsimalluni.