Naqinnernik ilisarinnissinnaanngitsut sammineqarnerulissapput
Tamanna meeqqap naqinnernik ilisarissinnaannginneranut paasiniaanermi sakkussanik naleqquttunik Nunatsinni sakkussaqannginnera pissutaavoq.
Naalakkersuisulli tamanna allanngortissinnaallugu neriuutigaat.
- Inerisaaviup suliummut siunnersuut Naalakkersuisunut ungasinngitsukkut tunniuppaa, suliniullu taanna atuartunik atuarnermik ajornartorsiuteqaratarsinnaasunik Nunatsinni paasiniaasarnermik ineriartortitsinissamik pingaarnertut siunertaqarpoq, Nick Nielsen Anda Uldumimut akissuuteqaammini taama allappoq.
Aammattaaq meeqqat atuarfinni atuartitsisunut atuartut atuarnermik allannermillu ajornartorsiuteqartunut tunngatillugu pitsaanerusunik sakkussaqalernissaat siunertaralugu pikkorissarnissamut ilinniaqqinnissamullu periarfissanik inerisaanissaq pilersaarutigineqarpoq.
Peqatigitillugu qarasaasiaq atorlugu ikiuutissanik ineriartortitsineq ingerlallualereersimavoq, ilaatigut "qarasaasiakkut oqaluut" kalaallisoortoq ineriartortinneqarsimalluni, taannalu ukiamit atuutilersumik meeqqat inersimasullu naqinnernik ilisarinnissinnaanngitsut, isigiarsuttut atuarnissamullu sanngiitsut iluaqutigilersinnaassagaat, Nick Nielsen oqaluttuarpoq.
Danmarkimi nalineqarpoq innuttaasut 5 aamma 15 procentiisa missaat atuarnermik ajornartorsiuteqartuusut.
Kisitsisillu taakku Nunatsinnut nuukkaanni, assigissavaa inuit 2000-it 8000-illu missaanniittut atuarnermik ajornartorsiuteqartuusut. Susassaqarfimmilu suliniutinik pitsanngorsaasoqarneratigut taakku pitsaanerusumik inuuneqalernissaat inuussutissarsiornikkullu pitsaanerusunik periarfissaqalernissaat anguneqarsinnaasoq, Anda Uldum § 37 naapertorlugu apeqqutaanut akissuteqaammi atuarneqarsinnaavoq.
