Naqinnernik ilisarinnissinnaanngitsut digitalimik ikiuutip nutaap pitsaanerusumik ikiorsinnaavai
Atuartut ilinniartullu atuarniarnermikkut allanniarnermikkullu ikiorneqarnissaminnik pisariaqartitsisut maanna teknologiimik nutaamik ikiuuteqalissapput.
Ikiuut IntoWordsimik taaguuteqartoq qarasaasiami programmiuvoq, qarasaasiani, tablet-ini mobil-inilu atorneqarsinnaasoq. Programmimi ikiuut atuffassisinnaavoq, oqaatsinik siunnersuuteqarsinnaalluni assinillu skannerisinnaalluni.
App-i meeqqat atuarfiini, ilinniarnertuunngorniarfinni, inuussutissarsiornermik ilinniarfinni Ilisimatusarfimmilu atorneqarsinnaalissaaq. Ilinniartitaanermut Aqutsisoqarfik tusagassiuutinut nalunaarummi taama allappoq.
Ilinniartitaanermut aqutsisoqarfik naapertorlugu ikiuut taanna ilinniartitsinermi naligiinnerusumik pitsaanerusumillu ikorfartuinissamik qulakkeerinnittussaq alloriarneruvoq pingaarutilik.
Ilinniartitaanermut aqutsisoqarfik qarasaasianik suliaqarnermik suliffeqarfik Vitec MV, IntoWordsimik ineriartortitsisoq, isumaqatigiissuteqarfigaa.
InToWordsimi oqaatsit qallunaatut tuluttullu atorneqarsinnaasut, kalaallisuunngortinnissaanullu ineriartortitsineq septembarip aallaqqaataani aallartissasoq, aqutsisoqarfik tusagassiuutinut nalunaarummi aamma allappoq.
Ilinniartitaanermut Aqutsisoqarfik sapaatip-akunnerata 40-p 45-llu akornanni Nuummi, Ilulissani, Sisimiuni Qaqortumilu ilinniartitsisut pikkorissarnissaannut neqerooruteqarpoq.
Tusagassiuutinut nalunaarut naapertorlugu nunami kommunit tamarmik immikkut teknologii taanna ilinniarfinni atuutilersissavaat.
