Napparsimasut Islandimi katsorsartinneqartalissapput
Napparsimasut paaqqutariuagassat siulliunneqartassapput soorlu meeraaqqat inorlutik inuusut inuillu tartumikkut uummatimikkullu ajuutillit. Tamanna angallassinerup sivikinnerulerneranik millioninillu sipaaruteqarnermik kinguneqassaaq, aammattaarli oqalutseqarnermut, timmisartumik angallassinermut najugaqarnermullu piumasaqaatinik nutaanik piumasaqaateqarfiulissalluni, taama oqarpoq Peqqinnissamut Naalakkersuisoqarfimmi pisortaq Ann Birkekær Kjeldsen.
Manna tikillugu Danmarkip napparsimasut nunatsinneersut katsorsarneqartarnerat isumagisaraluarpaa, maannali tamanna atorunnaartussanngorpoq. Napparsimasut siunissami Islandimut aallartinneqartalissapput, taama nassuiaavoq Peqqinnissamut Naalakkersuisoqarfimmi pisortaq Ann Birkekær Kjeldsen.
- Tamatumani tassaanerussapput naalungiarsuit inorlutik inuusut anersaartuuteqartillugit paaqqutariuagassat, aammalu inersimasut tartuluttut uumatiluttullu inuilluunniit inuit misigisimasaminnik kingunerlutsitsisut. Napparsimasut paaqqutariuagassat Kangerlussuaq aqqusaarlugu Danmarkimut timmisartuunneqartaraluarput, aqqutaanili uneqattaarpallaartarnerat pitsaasuunani, taamaattumillu pitsaanerussalluni Nuummiit Islandimut toqqaannartumik timmisartuunneqarunik.
- Napparsimasut taakkua nalinginnaasumik Danmarkimiit timmisartumik napparsimasunik angallassisartumik timmisartuunneqartarput, imaannavianngilarlu timmisartup angalasarfissaanik aallartitsissasugut, Ann Birkekær Kjeldsen nassuiaavoq. Apeqqutaalerporli Islandimi soorlu oqalutseqartarneq qanoq isumagineqartassanersoq. - Unammillernartua uaniippoq napparsimasunik Danmarkimi aaqqissuussinerput, napparsimasunut angerlarsimaffeqarpugut, nutserisoqarpugut napparsimasullu Danmarkimi atugaasa pitsaanerpaajunissaannut ataqatigiissaarisoqarluta. Taama aaqqissuussineq Islandimi piginngilarput, tamannaavorlu Islandimiunik oqaloqatiginnissutigisassarput. Nunani allani napparsimasunik katsorsaanermut aningaasartuutit ukiuni kingullerni amerleriapiloorsimapput.Ukiut arfiniliinnaat matuma siornagut nunani allani suliaritinnissamut 80 mio. koruunit immikkoortinneqartarput, ukiumulli tullermut aningaasanut inatsisissatut siunnersuummi 104 mio. koruuningajaat immikkoortinneqarlutik. Napparsimasut pingaartumik paaqqutariuagassat angallannerat akisoorujussuuvoq, tassami taakkua timmisartumik napparsimasunik angallassissummik angallanneqartariaqartarmata. Ukiormanna napparsimasunik angallassinerinnarnut 68 mio. koruuningajaat immikkoortinneqarput, tamatumanerpiarlu tassa Islandip atorneqarneratigut sipaaruteqartoqassalluni, Ann Birkekær Kjeldsen isumaqarpoq.
- Nalunngilarput ullumikkut napparsimasunik Danmarkimut angallassineq ataaseq agguaqatigiissillugu 400.000 koruuninik akeqartoq, taakkualu immaqa affaannanngortissinnaavavut. Napparsimasut soorlu 50-iuppata taava naatsorsorneqarsinnaavoq ukiumut 10 mio. koruunit sipaarutaasassasut. Ann Birkekær Kjeldsenip neriuutigaa napparsimasut amerlanerusut siunissami Islandiliartinneqartalerumaartut, ilaatigut pilattartittussat. - Islandimik oqaloqatigiissutigisassavut ilaatigut tassaapput siffissamikkut seeqqumikkullu suliaritittussanik utaqqisoqarnera, nalunanngivipporlu Islandimut angallavik tutsuiginarnerusoq pilersissinnaagutsigu, periarfissaqarnerulissasugut. Peqqinnissamut Naalakkersuisoq naalakkersuisoqarfinnilu assigiinngitsuni pisortat peqqinissaqarfimmilu sulisut qaammatip tulliani Islandimukassapputkalaallit napparsimasut katsorsarneqartarnissaat oqaluuseriniarlugu. Suut tamarmik pilersaarut malillugu ingerlassappata napparsimasut paaqqutariuagassat siulliit decembariuliinnartoq Islandiliartinneqassapput. Kalaallit Nunaata Islandillu akornanni suleqatigiinneq Islandimi peqqissaanermik sulisut maanga suliartorlutik aggersinneqarsinnaalernerannik aamma kinguneqarsinnaavoq. Tamatumani pingaartumik napparsimasunik paarsisut, nakorsat, juumuut aaviisarfimmilu sulisut pineqarput.
