Kræftertut Neriuffiit Kattuffiannut qinnuteqartartut amerliartorput
Nunatsinni inuit 170-it missaat ukiumut kræftimik napparsimalertarput. Imaluunniit sapaatip akunneranut inuit pingasut. Neriuffiit Kattuffiannit kisitsit tamanna takutippaat.
Neriuffiit Kattuffiat, kræftimik napparsimasunut aningaasanik tapiissuteqartartoq, tallimanngornermi unnukkut nuna tamakkerlugu tv-kkut aningaasanik katersuiniarniarpoq. Aningaasallu katersorneqartut ilarpassui kræftimik napparsimalersimasunut ataasiarluni tapiissutitut tunniunneqartarput.
Tapiissutit ukioq manna 168-it tunniunneqarput. 2016-imi 153-it tunniunneqartut. Tapiissutillu amerlanerpaat 2017-imi tunniunneqarput, tassa ukioq taanna 200-t tunniunneqarmata.
Aningaasat tapiissutigineqartartut 3.000 koruuniupput.
- Allaqqunneqarsinnaanngilaq periarfissiisinnaavoq aamma atorluaruminaqaaq. Ingammik nunaqarfimmiuulluni imaluunniit illoqarfinni mikinerusuniilluni aningaasat apeqqutaasorujussuusarput tassanngaannartumik pisoqartillugu, 57-inik ukiulik Kristoffer Petersen oqaluttuarpoq.
Kristoffer Petersen kræftimik napparsimalluni ukioq manna aggustimi paasivaa. Ernera aamma aammigut siorna kræftimik napparsimasimavoq. Taamaammat Kristoffer Petersen nammineq kræftimik napparsimalinngikkallarami kræftimik nappaateqartunut oqaloqatiginittartuusimavoq.
- Kræfti soorunami artornarpoq ikkummat, kisianni oqaloqatiginnittarnerit ernittalu napparsimareernerata kingorna eqqissisimallunga tiguara. Kisianni soorunami nuliannguara attortippoq, Kristoffer Petersen taama oqaluttuarpoq.
Neriuffiit Kattuffiannit legat-it ukiuni kingullerni sisamani tunniunneqartut:
- 2016: 153
- 2017: 200
- 2018: 198
- 2019: 168
Tapiissut inummut ataatsimut ataasiarluni tunniunneqarsinnaavoq. Inersimasumut 3.000 koruunit. Meeqqamut 1.500 koruunit.
Tapiissutit Kalaallit Nunaani akileraaruserneqartussanut ilanngunneqarneq ajorput.
Kilde: Neriuffiit Kattuffiat
Oqaloqatigininnerit iluaqutaasut
Neriuffiit Kattuffianni suliuniutit ilagaat napparsimasup ilaqutaasullu nappaat pillugu oqaatsigut atorlugit paasissutissanik pissarsisinnaanerat kiisalu oqaloqatiginnittartunik oqaloqateqartarsinnaanerat.
- Taamatut kalerrinneqarneq uannut tunngatillugu tupaallaataanikuuvoq, kisiannili eqqissisimassutigaara oqaloqatiginnittarninni nappaatip imarisai suunersut. Taavalu aamma oqaloqatiginnittarninni paasissutissat assigiinngitsut pisimavakka, Kristoffer Petersen oqaluttuarpoq.
Neriuffiit Kattuffianni siulittaasoq, Mette-Sofie Jørgensen, ilisimatitsivoq ukiuni kingullerni tapiissutinik qinnuteqartartut amerlisimasut.
- Legatinik qinnuteqartartut amerliartorput. Uagullu statistiskiuterput malillugu sapaatip akunneranut inuit pingasut kræfteqarlutik oqarfigineqartarput. Taakkuupput taamaallaat uagutsinnut qinnuteqartartut, imaassinnaavoq nunatsinni suli amerlanerusut.
Inuimmi 719-init ukiuni kingullerni sisamani aningaasatigut tapiiffigineqarusullutik Neriuffiit Kattuffiannut qinnuteqarsimapput.
- Taamalilluni ukiuni siuliini naleqqiullugu amerliartorneri eqqarsaatigalugit taamaammat pisariaqarterujorujussuarpagut aningaasat, Mette-Sofie Jørgensen oqarpoq.