Nanu Børn millioninnappoq
Nanu Børn-ip illu ornittagaq siulleq, Neriusaaq, Qaqortumi sapaatip-akunnerata naanerani ammassavaa. Pisussaq sioqqullugu aningaasaateqarfik Bikubenfonden 1 millioni koruuninik inuusuttunut tunissuteqarpoq.
Bikubenfonden-ip tunissuteqarnerminut atatillugu aningaasat ukiut pingasut ingerlaneranni tunniunneqartassasut nalunaarutigaa. 2011-mi 200.000, 2012-imi 400.000 aamma 2013-imi 400.000 koruunit. Aningaasaliissutit meeqqat, inuusuttut angajoqqaallu Neriusaami sammisassaqartinneqarnissaanut atorneqassapput.
- Nanu Børnip taamatut akuerineqarnera assorsuaq nuannaarutigaara, akuerineqarneq aningaasaliinikkut ersersinniarneqartoq paasillugu qulakkeertussanngorpaarput Qaqortumi ornittagassami suliniutit nuannersut aallunneqarsinnaanngornerat, Nanu Børnimi siulittaasoq Krissie Winberg oqarpoq.
- Aamma uatsinnut Nanu Børnimi suliniartunut imminut tatigineq annertuseriarpoq, tassami ornittakkap allallu ornittagaalersussat pilersinniarneri ilungersorluta anguniarsimagatsigu, Krissie Winberg oqarpoq.
Nanu Børnip anguniarpaa inuttut susassareqatigiinnerup nukittorsarnissaa nunatsinnilu meeqqat ilaqutariillu pitsaanerpaamik ikiorneqarnissaat. Qaqortumi ornittagassaq tassaavoq ornittakkat Nanu Børnip pilersitaasa ataavartussat siullersaat. Ornittagassaq Kommune Kujalleq qanimut suleqatigalugu pilersinneqarpoq.
Nunaqarfimmi Tasiusami ornittagaq ’Lys i Mørket’ aamma ammarneqaqqammerpoq. Ornittakkat "Lys i Mørket"-mik taasat piffissani aalajangersimasuni ammassassapput. Ammanerini meeqqat inuusuttullu sukisaarsaarlutik, eqqissisimaarlutik, filmerlutik, pinnguarlutik nerillutillu isersimaarsinnaassapput tamatigullu inersimasumik oqaloqateqatigineqarsinnaasumik isersimasoqartassaaq.
