Nanortalimmiup pinerliiniaq tilluuteqatigisimagaa
Taanna oqaluttuarpoq Københavnimi Krudttøndenimi Krystalgademilu pinerluttutut pasineqartoq allaaserineqarmat kinaanersoq paasigamiuk tupassimaqaluni unamminikuugamiuk.
- Atia assingilu nutaarsiassani takugakkit ilisaraara tupattorujussuullungalu. Eqqumeeqaaq tilluuteqatiginikuullugu, 36-nik ukiulik Peder Tækker Jepsen, Ekstra Bladetimut taama oqarpoq.
Timersorneq iluaqutigisimasinnaagaluarpaa
Københavnimi arfininngormat toqutsisutut pasineqartoq, Omar Abdel El-Hussein 22-nik ukiulik, tilluuttartuuvoq pikkorissoq, novembarimi 2013-mi savilersorluni saassussinermi kingorna parnaarussaanissami tungaanut.
- Timersorneq aqqutigalugu pitsanngorusussimagaluartoq ilimagaara, tamannali iluatsissimanngilaq, Peder Tækker Jepsen oqarpoq.
Unamminermit 2013-imi Danmarkimi videoliaq Ekstra Bladetip nittartagaani takuneqarsinnaavoq, tassani Omar Abdel Hamid El-Hussein sungiusarluarsimaqisup tilluuttartoq Nanortalimmiu Peder Tækker Jepsen unammivaa.
Tilluuttartoq pinerluttartoq El-Hussein tilluuffimmi inuunera kipinngilaq, kisianni Københavnimi Svanevejimi sapaatiummat ullaassakkut tallimanut politiit aallaallugu toquppaat.
