ASSIT Nanoq kappusimasoq uissuummisitsisoq

Nanoq ruujorimut uuliap aqqutaanut kappusimasoq Københavnimi Christiansborg Slotspladsimi takuneqarsinnaavoq. Jens Galsschiøtsip silap pissusianut tunngatillugu eqqumiitsuliaa Folketingip isaarioaata saavani saqqummersinneqarpoq.

Eqqumiitsuliaq 7x12 meterinik takitigisoq, silap pissusia pillugu ataatsimeersuarnermut COP21-mut atatillugu Parisimi siorna decembarimili saqqummersinneqartoq, partiip Alternativetip saqqummersitarivaa. Ukioq 0-imit 2015-ip tungaanut CO2-mik aniatitsinerup qanoq annertutigineranik nunarsuarmi aalajangiisartunut takussutissatut suliaavoq. 

- 2007-mit 2015-imut kisitsisit nutartertussanngorakkit tupaallappunga.  Nunarsuarmioqatigiimmi CO2-mik aniatittagaasa tamarmiusup tallimararterutaa ukiut arfineq-pingasut ingerlaneriinnaanni aniatissimavarput - uffa massa nunarsuarmi aningaasarsiornikkut ilungersunartorsiorneq annertooq piffissami tassani pigaluartoq, eqqumiitsuliortoq nittartakkamut klimadebat.dk-mut oqarpoq.

Nanoq kanngussamik sanaajusoq  kappusimasorlu Københavnimi tallimanngormalli saqqummersinneqarpoq. 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl