Nanoq kaattoq angallammut ikisoq: Nannup niaqquni igaffimmut nuisillugu umiarsuup naalagaa tupatsikkaa
Niels P. Kristensen anertikkarpoq. Taassuma nipaa oqarasuaamminik immiussaatulli sajukulaarpoq.
Qalianiimmi nanoq tassunga toqqaannartumik isigivoq. Nanoq naamasaqarpoq.
- Qujanartumik igaffiup qulaaniikkami matu ammartartoq savimineq. Taassuma ammanerani igaavisa tipaata tassuunga anianera naamasimallugu taanna iserniarfigigaluarpaa, Niels P. Kristensen taama oqarpoq
Nanumik angallataaniittoqartoq. Nanoq igaffimmut iserusuttoq. Nanoq ersissuteqanngitsoq.
Videomi matumani qulaani takusinnaasanni pisoq angallammi 'Sannatit'-ni maanna Tunumi Mestervigip eqqaani angalasumi pivoq.
Seqqortoqarnera soqutiginngikkaa
Angallatip igasua igaruttorluni ilaasoq qaaqquneqanngitsoq angallatip qaaniittoq takoriataarpaa.
Nanoq angallammut ullualuit qaninngoorsimavoq, qaleruaalu qarsullugu qaqisimalluni.
Nanoq kissarsuummit igaat nipaata tungaanut ingerlaarpoq.
AAMMA ATUARUK Nanoq igalaakkut iseriarluni angut assaatigut kiigaa
Sannatillu naalagaat, Niels P. Kristensen tuaviupallappoq.
- Allatut ajornartumik qunusaartarpagut. Kisianni ukua soqutigivallaarneq ajorpaat. Qunusaarneqaraluarunilluunniit malersorneqaraluarunilluunniit soqutigerpiarneq ajorpaat, Sannatini naalagaq, Niels P. Kristensen Qanoruumut oqarpoq.
Nanoq toqunneqaqqusaanngilaq, qulimiguulillu atorlugu nanoq angallammit qimaatinneqarluni imaanut aqqarteqqinneqartariaqarsimalluni.
Suli qaninngoortoq
Angallammi inuttat tunup sineriaani angalanerminni nannumik aatsaat naammattuuinngillat.
Assi: Niels P. Kristensen.
Aatsaalli siullermeertumik nanumik qaqisoqarpoq. Nanoq Niels P. Kristensenimik taassumalu inuttaqataanik soqutiginnikkunnaarsimarpasinngilaq.
AAMMA ATUARUK Paornánguup nannut marluk illuaqqap igalaavatigut takuai: Nuummut taama qanitsigisunik takunngisaannarpunga
Angallatip naalagaata Qanoruumit oqarasuaatikkut oqaluunneqarnermini nanoq isiginnaarlugu oqaatigaa.
- Aajuna uani eqqatsinneerujoorluni ingerlaarpoq. Isiginnaartuarparput.
