Nanoq igalaakkut iseriarluni angut assaatigut kiigaa

Filmiliortut pingasut ippassaq unnuakkut nuanninngilluinnartumik pulaartoqarput. 

Aarhus Universitetip ilisimatusartunut illuutaanni, Daneborgimi Silasiorfimmiit 400 meterinik ungasitsigisumiittumi, taakkua sininniarlutik, unnuakkut itersimapput ineeqqami igalaakkut ammasukkut nanoq isertertoq. 

Issittumi Upalungaarsimasut taama nalunaarpoq. 

Nanoq siumut pissilluni angut assaatigut saamerlikkut kiisimavaa. Angut suaartarluni ilani kalerrillugit ikiormanni, angut nannup iperarsimavaa.

Nanorli saassusseqqissimavoq. Angutilli taakkua pingasut iluatsittillutik ajunaalernermi qummoroortaammik nanoq qimaatissinnaasimavaat.

Tamatuma kinguninngua filmiiortut Alapernaarsuisut Siriusimeersut attaveqarfigisimavaat. Siriusimi alapernaarsuisut marluk ilisimatusartut illuannut apuukkamik, kiitittoq nakorsaatinik katsorsarneqartariaqartoq nalileramikku, angut Daneborgimi Silasiorfimmi nakorsiartarfimminnukaappaat.

Tassani, Danmarkimi Siriusip nakorsaa ikiorsiullugu, kiitissimasoq Siriusimeersut marluk suliaraat. 

Angulli sukumiinerusumik katsorsarneqartariaqartoq nalileramikku, Issittumi Sakkutooqarfiup angut suliareqqitassaammat, ataasinngormat Akureyrimukaappaat.

Unnuakkut illuaraq Siriusimeersut misissoramikku, igalaat arlallit misissortariaqarlugit, igalaa ammasoq nassaarisimagaa tumaatigut takusinnaasimavaat. 

Filmiliortut nanoq utertoq ullaakkut radiokkut nalunaarutigisimavaat. Siriusimi Alapernaarsuisut nanoq qimaatikkaluaramikku, ilisimatusartut illuannut utersimavoq. 

Marlunngormallu unnuakkut nalunaaqutaq marlunut, nanoq illumut iseqqinniarsarilerpoq. Tamatumuunalu igalaat ilaat aserorlugu. Filmiliortulli kiserngoruttut marluk nanoq isertinnaveersaarlugu qimaatissimavaat.

Namminersorlutik Oqartussat nanoq 'ajornartoriutaasutut' nalilerpaat, taamaammallu nanoq uteqqikkaluarpat aallaaneqarnissaa akuersissutigineqarluni. 

Nanoq taanna tallimariarluni saassussisareernikuusoq ilisimaneqarpoq.